Шарвили тек туш, вучиз лагьайтIа адахъ вич теснифай халкьдин нефес гала. Шарвилидин далудихъ халкь гала.
Алирза Саидов, шаир.
Тарихдин риваятар тестикь хьун патал, лугьуз жеда, риваятрихъ нартрин сюжетар, пагьливанрикай кьисаяр, кьисайрик квай лезгийрин «Шарвили» эпосдин игит лазим атана.
Гьажи Гьамзатов, Россиядин илимрин Академиядин академик.
Шарвили лезгийрин лап алатай девиррин, яни дегьзаманрин чан алай сес хьиз, халкьдин муьтIуьгъ тежер руьгьдин гьунар хьиз, багьа я.
Фируза Вагьабова, филологиядин илимрин кандидат.
Шарвилидикай эсерри чпин фантазиядин кьакьанвилелди, тарихдин кьетIен риваятлувилелди, ватанпересвилин тербиялувилелди, фикирдин маналувилин этикадин тербия гуналди къенин юкъуз чун гьейранарзава.
Айбике Гъаниева, филологиядин илимрин кандидат.
«Шарвили» къенин чи халкьдин руьгьдин бине, чи девирдин лезгийриз чеб буш майдандал атай халкь яз ваъ, тарихдин гьерекатри, женгерини ислягь йикъари, тIебиатдин чIехи татугайвилерини берекатлу йикъари эбеди тестикьарнавай вичин культура датIана вилик физвай халкь яз къалурзавай зурба чешме, халкьдин къамат аквазвай гуьзгуь я.
Абдул Фетягъ, писатель, шаир.
«Шарвили» лезги халкьдин ивидин ярувални михьивал, адан вацIарин йигинвални дагъларин рехивал, чарчаррин кьакьанвални булахрин деринвал, яйлахрин иервални бубайрин гъилерин, дидейрин рикIерин чимивал я.
Зульфикъар Къафланов, шаир.