Версия для слабовидящих

«Шарвили» лезги халкьдин руьгьдин чIехивал къалурзавай чешне я

“Шарвили” эпосдин су­вар лезги халкьдин уьмуьрда фикир гуник квай лайихлу вакъиадиз элкъвенва. Ада чи не­сил­рив алатай вахтар, тарих, вакъиаяр мад ва мад ве­ревирд ийиз тазва. Халкьдин этнокультурадин суварин ва­жиб­лу ихьтин терефрал, метлебрал кье­тIен фикир желбиз кIан­зава: общественно-политический ва идеологиядин; медениятдинни тарихдин ва художественно-эстетический; просветительско-дидактический, эдебдинни тер­биядин.

Эпосдин суварин идеологиядин, общест­венно-политический бине тарих, адан ва­къи­аяр, крар рикIел хуьнин, несилрин ала­къа­­лувилин, игитвилин, халкь мукьва этносрин хизанда тупламишунин идея я. Тарих — им халкьдин уьмуьрда неинки чIехи вакъиай­рин летопись, гьакIни чIехи муаллим ва виликди финин замин, тарихдин идеологияни халкьдин уьмуьрди цуьк акъудун я лугьуз жеда.

Кьвед лагьай тереф “Шарвили” эпосдин текст, мана датIана раиж (пропаганда) авуни­кай ибарат я. “Шарвили” халкьдин сивин яратмишунрин анжах са памятник туш, ам халкьдин руьгьдин чIехивал къалурзавай делилни я.

Суварин пуд лагьай тереф къадим тарихди чав мукъаятдаказ, къайгъударвилелди агакьарнавай художественный текстинин этнопедагогикадин терефрин жуьреба-жуьрви­ликайни девлетлувиликай ибарат я. Са рахунни алач, “Шарвили” чи лезги халкь халкь яз арадал атунин, виликди финин рехъ къалурзавай этнопедагогический гужлу, къудратлу гьа­къи­къат я.

Лауреат премии Золотой орел СЖ РД (2006),член союза журналистов России, писатель Фахреддин Оружев
"Лезги газет"


05.07.2017

Возврат к списку