Гьуьрметлу агъастIалвияр! Гьуьрметлу мугьманар!

Ингье мад чун къе, нубатдин 18 майдиз, Агъа-СтIалдал, СтIал Сулейман бубадин кIвализ мугьман хьанва. Къенин югъ шииратдин сувар яз Дагъустандин гзаф пипIера кьиле тухузва. Кьилди къачуртIа, республикадин меркез тир Махачкалада, лезгияр яшамиш жезвай вири районра и сувар шад гьалара къаршиламишзава, чIехи шаирдин яратмишунрал рикI алай ксари адаз чпин патай авай гьуьрмет къалурзава.
Чун паталди, чи район паталди къенин суварихъ илаки чIехи мана-метлеб ава. Сад лагьайди, им чи ватанэгьли, зурба шаирдин поэзиядин югъ я, кьвед лагьайди, вичин тIвар чи райондал хьуниз килигна, къенин югъ – чи райондин югъ я лагьайтIани жезва.
За квез "СтIал-Сулейман" муниципальный райондин администрациядин, жуван патай къенин сувар рикIин сидкьидай мубаракзава, квехъ гзаф-гзаф йисара ихьтин суваррик иштаракдай мумкинвилер хьун кIанзава.
СтIал Сулейман - лезги халкьдин дерин къатарай акъатай, акьулдин ва камалдин аршдиз хкаж хьайи, садан виликни гардан кIир тавур, такабур инсан ва шаир хьана. Четин аялвиливайни, Дербентда батраквиливайни, Юкьван Азияда акур гужаривайни адал тIем гъиз хьанач: Сулейман буба уьмуьрдип эхирдалди михьи рикI, хци зигьин, чIехи жуьрэт ва зурба руьгь авай кас яз амукьна.
Шиирар кхьин адаз рикIин эвер тир, Аллагьди ганвай пай хьана. Мектебра кIелначтIани, ам дуьньядикай хабар авай, уькIуь-цуру акунвай инсан тир. Вичиз акур, вичин кьилел атай крарикай фикирар ада шиирралди ачухарзавай. Гьа чIавуз саки вири Сулейманан хьтин кьисметдин инсанар тир, гьавиляй халкьди адан чIалар хушдиз кьабулзавай. Вири вахтара ам кесиб халкьдин терефдар хьана, садрани вич хьтин "кьисметди канвайбурун" итижар маса ганач.
СтIал Сулейманакай рахадайла мад са кардиз фикир тагана жедач. Советрин девирда гзафбуру ам анжах "цIийи социализмадин гьакъикъат" ачухарзавай шаир яз къалурзавай, гила лагьайтIа, шаир советрин властдиз акси тир лугьудайбур акъатнава. Ибур, гьелбетда, къундармаяр я. СтIал Сулейманаз вири вахтара халкьдиз вуч багьа тиртIа, гьам багьа хьана, халкьди вуч негьзавайтIа, - гьам негьна. Им тушни бес халис халкьдин шаирриз хас хесет?
Чи чIехи шаирдин тIварцIел леке гъиз алахънавайбуруз чна кьетIидаказ дурум гана кIанда. Гьар йисуз 18-майдиз, ингье къе хьиз, и майдандал гьвечIидалай чIехидалди вири халкь кIватI хьун – им гьахьтинбуруз чна гузвай дурум я, жаваб я!
Хайи халкьдин кьил виниз авур, хайи халкьдал баркалла гъайи, хайи халкьдин камалдин ва къанажагъдин гуьзгуь хьайи СтIал Сулейман чна садрани рикIелай ракъурдач!
Гьуьрметлу дустар! Къенин сувариз талукь гъвечIи тебрик заз чи виридан рикI алай рагьметлу Абдулкъадир Сайдумович Сайдумован гафаралди куьтягьиз кIанзава:

Сулейманан тIварар ава
Шегьеррани хуьрера,
Сулейманан чIалар ава
Гьар са касдин кIвалера,
Сулейманан гьунар ава
Ам истеклу рикIера...
Океанрал еирнавзава
Сулейманан гимиди.
Сулейман я чи аямдиз
Виридалай кIаниди.
Къад асирдин Гомер я ам
Акьул, камал хци тир.
Сулейман я Дагъустандай,
Дагьустандин халкьдин шаир,
Лезгистандай,
Лезги шаир...
Виридалай чIехи тир!

Сагьрай!

18.05.2011

Возврат к списку