Версия для слабовидящих

Новогоднее поздравление главы района

Ингье са шумуд сятинилай чна мад са йис тарихдиз рахкурда ва цIийи, 2011 йис, къаршиламишда. Гьар хъфизвай йисанни цIийи йисан сергьятдал агакьайла, инсандиз акъатзавай йисуз вичин уьмуьрда хьайи крар веревирд авун ва алукьзавай йисавай цIийи бахтар, хъсанвилер тIалабун хас я. Са шакни алач, акъатзавай 2010 йис чи гьар са ватанэгьли паталди, санлай къачурла, чи СтIал Сулейманан район паталдини лишанлуди хьана.
Ихьтин суварин юкъуз кIвалахрикай, къазанмишнавай агалкьунрикай гзаф рахадай адет туш. ЯтIани заз алатзавай йисуз чи районда хьайи са шумуд вакъиа куь фикирдиз хкиз кIанзава.
2010 йисуз райондин уьмуьрда виридалай важиблу вакъиа – им, гьелбетда, Дагъустандин Президент Магомедсалам Магомедалиевич Магомедов кьилевай республикадин Правительстводин делегациядин иштараквал аваз «Сардаркент-Даркушказмаляр» водоводдин кьилин сооружение ачухун хьана. Яд уьмуьрдин диб, бине я. Гьавиляй чи халкьарини а югъ, куь рикIел аламатIа, чIехи сувар хьиз кьиле тухванай.
Районда гьахьзавай къекъуьндал са йисан къене эцигай имарат – им чи патай къвезмай несилриз савкьат я. Ам чи чIехи шаир, камалэгьли СтIал Сулейманан гуьмбетдалди акьалтIарунихъни кьетIен метлеб ава: ам вичин тIвар чи райондиз ганвай арифдардиз чи патай авай гьуьрмет ва кIанивал къалурунин лишан яз виридавай кьабулайтIа жеда.
Алатзавай йисуз чаз виридаз мад са баркаллу чи ватанэгьлидин, Дагъустандин литературадин бине кутурбуракай сад тир Алибег Фатахован 100 йисан юбилей шад гьалара къаршиламишдай мумкинвал ва бахт хьана. Шаирдин хайи хуьре, Цмурдал адан гуьмбет хкажна ва сифте яз писателдин хкягъай эсеррин кьилдин ктаб чапдай акъудна.
Гьелбетда, районда алатзавай йисуз хъсан кIвалахар мадни хьана. Вирибурукай инал рахунни виже къвезвач. Амма са кар лугьун тавуна акъвазиз жедач: районди къазанмишнавай агалкьунар – им чи гьар са хиле зегьмет чIугвазвай пешекаррин - муаллимрин, духтуррин, хуьруьн майишатдин работникрин, санлай къачурла, вири чи зегьметкеш халкьдин гьунар я.
Алукьзавай цIийи йисузни, фикирар ва къуватар сад авуна, чна райондин вилик акъвазнавай вири месэлаяр кьилиз акъуддайдак за дериндай умуд кутазва.
Азиз тир районэгьлияр!
ЦIийи йисуз къуй куь кIвалера цIийи бахтар, берекатар хьурай! Къуй куь вири экуь мурадар кьилиз акъатрай!


31.12.2010

Возврат к списку