Версия для слабовидящих

Новости

Имена, достойные похвал

алимет.jpg

В «Лезги газет» появилась статья о нашем земляке, замечательном докторе, депутате Народного собрания(1995г.) Республики Дагестан Алиметове Альберте Гаджимагомедовиче.
"ТIебии кар я, садбурун тIварар, фамилияр хуьре, районда, республикадани машгьур  жеда: чпин хъсанвиляй, баркаллу крар, уьмуьрда чпи тазвай гел себеб яз. Масадбуру лагьайтIа, тахсиркарвилер ва я чалке-чирвилер авуналди, чеб алай чка чирда.
Къе заз адлу сихилдай, гьакъисагь зегьметдалди, баркаллу краралди халкьдин патай гьуьрмет, авторитет къазанмишнавай фамилдин са хцикай - вичин 70 йис тамам хьанвай чи юбиляр, Дагъустан Республикадин Халкьдин Собранидин депутат хьайи Алиметов Альберт Гьаджимегьамедовичакай суьгьбет ийиз кIанзава.
...1960-йис. Кьисметди зун Агьул райондиз акъудна. Кьасумхуьруьн райондай тирди чир хьайила, завай саки гьар сада хабар кьадай: “Ваз куь патарай тир Алиметов Гьажимегьамед чидачни? Ада чи районда саки Ц|уд йисуз КПСС-дин райкомдин секретарвиле к1валахна и мукьвара Кьасум-
хуьрел хъфенва...”
Жегьил пешекар яз анжах кIвалахал фенвай заз и касдикай хабар авачир. 1962-йисан гафтар. КПСС-дин ЦК-дин Пленумдин къарардалди районар сад авунай, гьа жергедай яз - Кьиблепатан Дагъустандин бязи районарни. Зун а вахтунда лезги чIалал акъатзавай “Агъулрин колхозчи' газет-
дин жавабдар секретарь тир. Редакция тергна, Кьасумхуьрел “Коммунизмдин гатфар”тIвар алаз районрин уртах (виликан Агьул,Хив, Кьурагь, Мегьарамдхуьруьн ва Кьасумхуьруьн районар патал) газет акъудиз башламишна. Зун гьа и редакцияда цIийиз акъатзавай газетдин редактор Алиметов Саида кIвалахал кьабулзава. (Рагьметлуди Агъула КПСС-дин райкомдин 1-секретарь хьайи Гьалиметован стха тир кьван). Вичиз женнетар кьисмет хьурай – гьакъикъи регьбер, буба авачирдаз буба, стха авачирдаз стха тир.
1965-йис. Зун Махачкъаладиз “Коммунист" (гилан “Лезги газет") газетдин редакциядиз хкизва... Къуллугь себеб яз районриз командировкайризфизва. Нубатдин сеферда зун Хивда ава. Алиметоврин фамилия рикIел тагъай са дуьшуьшни хьанач: Агъа СтIалдилай тир Сайид ана райисполкомда, Гьажимегьамедни (кьведни Алиметовар) КПСС-дин райкомда хейлин йисара жавабдар къуллугърал хьанай. Алиметоври инани чпин гел тунвай...
Са сеферда КьванцIила (Хив район) командировкада авайла, мад Алиметоврикай суьгьбет кватна. Махачкъалада “Каспий" санаторийда ял яна, сагъламвал мягькемарна хтай жегьил итимди анин кьилин духтурдин - Альберт Алиметован тарифарзавай, санаторийда авай къулайвилерикай суьгьбетарзавай. Лугьумир кьван, Альберта 10-класс КьванцIилрин школада куьтягьнай. КьванцIилрин “жегьилриз” ам хъсан ученик, викIегь спортсмен язни чизвай...
Мад Алиметов! Гила Альберт. Хайи Сулейман-Стальский райондин сечкичийри Дагъустан Республикадин Халкьдин Собранидиз чпин векил яз хкянавай депутат, “Дагъустан Республикадин лайихлу духтур”, “азаддиз кьуршахар кьунай СССР-дин спортдин мастер! За адахъ галаз мукьувай гуьруьшмиш хьун, 70 йисан уьмуьрдикай газетдиз кхьин кьетIна. Дуьз лагьайтIа, заз ам чкадални са акьван регьятдиз жагьанач. Зенгер, хабар кьунар... Эхирни чун кабинетда ава.
Дамах гвачир, яшаризни килигтавуна, чагьинда амай итимди са артух хев квачиз ихтилат башламишна.
...Ватандин ЧIехи дяве куьтягь хьана анжах кьве йис алатнавай. Махачкъала шегьерда КПСС-дин обкомда кIвалахзавай агъастIалви Гьажимегьамед Алиметоваз адан уьмуьрдин юлдашди кьвед лагьай хва багьишна. Аликаз Альберт лугьудай стха хьана. Йисар къвез алатна. Кьисметди Альберт гагь саниз, гагь масаниз акъудзавай. ИкI, гьазурлухвилин классдиз Тпигъа (Агьул район) гьахьай ада 6-класс гьана, 7- класс Кьасумхуьрел, 8-9-классар Дербент шегъерда акьалтIарна. 1964-йисуз Хив райондин КьванцIилрин юкьван школадиз -10- классдиз фена. Физкультурадал ва спортдал рикI алай жаванди азаддиз кьуршахар кьунай районрин, республикадин акъажунра гъалибвилер къазанмишзавай. Гьа са вахтунда технический вуздин радиотехнический факультетдик экеч|ун патал гьазурвилер аквазвай. Бирдан, вичи рикIел хкизвайвал, КьванцIилрин клубда “Коллеги” тIвар алай кинофильм къалурзавай. Пердедилай духтуррин агалкьунар, хирургрин алакьунар аквазвай. Гьанлай жаван духтурвилин пешедал ашукь хьана. Юкьван образованидин аттестат къачур Альберт Дагмединститутдик (лечфак) экечIзава.
- Я зун медалист тушир, я за мединститут яру дипломдалди куьтягьнач. Гьа са вахтунда ажузвални авунач, - лугьузва ада.
Пад-къерех акунвай, спортдин майдандал лигим хьанвай жегьилди институтда вич алай чка чирна, оперативный хирургиядай кружокра иштиракна. 1970-йисуз мединститут акьалтIарай 286 касдикай 12 жегьил пешекар СССР-дин оборонадин министерстводин ихтиярдиз рекье твазва, гьа жергедай яз Алиметовни. Ада Костромада ва Забайкальский военный округда полкунин духтурвиле кIвалахна.
Къуллугь куьтягьна, меркездиз хтай жегьил пешекар Махачкъала шегъердин “Тади куьмекдин” станцияда кIвалахал кьабулзава. Низ чида, ахвар тавур йифер, кьарай атIай йикъар гьикьван хьанатIа?!
- Са дуьшуьш бейнидай гьич акъатзавач, - рикIел хкизва Альберт Гьажимегьамедовича, - Махачкъаладин научный городокда кIвал хъиткьинай вахтунда зун дежурствода авай. Им мусибат тир. Са подъезддин пуд лагьай мертебада авай кIвалер вири подвалдиз фенай, 11 кас телеф хьана, гзафбур залан хирер алаз республикадин центральный больницадиз агакьарна. Рекьизвай инсандиз жувавай куьмекиз тахьун гьикьван гьайиф къведай кар я!
...Гуыъуьнлай кьве йисуз клиникадин ординатурада чирвилер артухарай ва пешекарвал хкажай жегьилдин тешкилатчивилин ериярни дуьздал акъатна ва адаз Махачкъала шегьердин “Чайка” тIвар алай ял ядай кIвализ кIвалахал теклифна. Ахпа адакай пансионат, 1982-йисалай “Каспий” тIвар алай санаторий хьана. Ана яргьалди кьилин духтур яз кIвалахай Альберт Гьажимегьамедовича курортологиядин къурулушдай са куьруь вахтунда кьил акъудна. Агъзурралди инсанрин сагъламвал мягькемарна. 250 касдикай ибарат дуствилин коллектив тешкилна. Курортникар патал яшамиш жедай корпусар, культурадин дворец, Манасда курортдин поликлиника ва маса да- раматар эцигна, ишлемишиз вахкана, алай девирдин медицинадин алатралди тадаракламишна. Дагъустандин тарихда сифте яз психотерапиядин кабинет ачухна.
“Каспийда” санлай 600-700 касди (гатун варцара гьатта 800-900) чпин сагъламвал мягькемзрзавай. 1984-1986-йисара санаторийдин коллективди гьич са шикаятни авачиз кIвалахна. 1984-йисуз санаторийдин коллектив СССР-дин курортрин Центральный Советдин ва медработникрин профсо- юздин ЦК-дин Гьуьрметдин грамота ва 1986- йисузни Вирисоюздин соцсоревнованида гьалибвал къазанмишунай гъиляй-гъилиз къведай Яру пайдах гуниз лайихлу хьана. А вахтара Альбертан тIвар гьам Камчаткада, гьам Ленинграддани Москвада... - уьлкведин кьуд пипIе гзафбуруз сейли тир.
...Девирар дегиш хьана, къуллугьарни. Сечкичийри А.Алиметовахъ еке ихтибарна - ам РД-дин Халкьдин Собранидиз депутатвиле хкяна.
- Икьван хъсан пешекар, здравоохраненидин тешкилатчи политикадал машгъул хьунихъ гьихьтин метлеб ава? - хабар кьуна за адавай.
- Зи рикI зи халкьдихъ кузвай. Адани зун вичин векил яз хкянай. Зун вафалу хьуниз мажбур я. Муькуь патахъай, малум тирвал, Халкьдин Собрание - им законар кьабулдай орган я. Депутатдихъ вичин гаф, ихтиярар ава. За, гъабурукай менфяткъачуна, зи халкьдиз жувавай жедай регьятвилер, къулайвилер яратмишун патал чалишмишвална. Гьа икI,3-4 йисуз сечкичийри ихтибарнавай депутатвилин везифаяр тамамарна. Ахпа саки 13 йисуз гьа Халкьдин Собранидин са комитетда гьакъисагьвилелди кIвалахна.
Лайихлудаказ ял ягъиз экъечIайдалай гуьгъуьнизни чи кьегъал хва гъакI акьвазнач. Ам са шумуд йисуз Махачкъала шегьердин 4-нумрадин поликлиникадиз регьбервал гана. Алай вахтунда Дагъустандин государ-ственный медуниверситетда кIвалахзава.
Адахъ гьуьрметлу хизан - уьмуьрдин юлдаш Динара, пуд велед (Тимур, Карина, Осман), картар хьтин 5 хтул ава.
- Эвленмишнавайбурухъ чпин кIвал- югъ, кIвалах (Тимур - юрист, Карина - духтур) хьана. Миннацда кIвалахзавай Осман гьелелиг сусан суракьда ава, - лугьуз милиз хъверзава хизандин кьили.
И йикъара Махачкъалада юбилярдин шад ва гурлу межлис кьиле фена. Адаз лишанлу югъ тебрикиз медуниверситетдин реюгоратдин членар, мукьва-кьилияр, ярар- дустар кIватI хьанвай. Кьуд патай мубаракардай телерни гзаф хтанвай.
Къуй вахъ мягькем сагъламвал, яргъал уьмуьр, хтулрихъни хушбахт гележег хьурай, гьуьрметлу Альберт Гьажимегьамедович!"

Автор: Алаудин Гамидов
«Лезги газет» № 38 от 21.09.2017г.


Количество показов: 243
21.09.2017

Возврат к списку