Новости

"Лезги газет" о трудовых буднях Касумкентского детского сада №3

Са т1имил вахтар идалай вилик чун Сулейман-Стальский райондин Кьасумхуьруьн 3-нумрадин аялрин бахчадиз мугьман хьана. Авайвал лагьайт1а, ана мукьвара ц1ийи заведующий тайинарнавайдакай, ина са жерге ц1ийивилер кьиле фенвайдакай чаз хабар авачиз тушир. Бубайрин мисалда дуьз лагьанва: са сеферда жуван вилералди акун хъсан кар я. Дугъриданни, бахчада хьанвай дегиш вилер гъеле куьчеда амаз кьат1уз жезвай: анаг элкъуьрна кьунвай къавахдин ва маса кьакьан зурба тарар ат1анвай (заз абур rap акъатайла, аялрин бахчадин къаварал аватуникай гьамиша к1ичетир), дарамат ракъинин нурари къужахламишнавай, гъаятда чка кьунвай гьар жуьредин рангарин цуькверин гуьрчегвили гуьгъуьлар мадни хкажзавай...
Чун аялрин бахчадиз агакьайла, нисинин т|уьн недай вахт алукьнавай. Кьуд патахъ чк1извай хуьрекрин ниэри аялрин иштягьар ачухнавай, абуру суфрайрихъ чпиз чкаяр кьунвай. Инин коллектив заз фадлай танишди я, бахчадин тербиячийрин арада заз тербия гайи ксарни ава, за абуруз екез гьуьрметзава. Гьар садахъ галаз хваш-беш авуна, зун заведующий Раиса Надировна АМИНОВАДИН кабинетдиз гьахьна.
Чи арада хьайи суьгьбетдай малум хьайивал, Раиса Аминова 1986-йисуз Дербент райондин Белиж посёлокда дидедиз хьана. Аял вахтар Къазахстандин Ц1ийи Уьзен шегьерда акъатна. Школада Фригьдал к1елна, 2003-йисуз анаг акьалт1арай жегьил руша ДГУ-дин Дагъустандин филологиядин факультетдиз фин кьет!на. Вичин хизан кутурдалай кьулухъ к1елунар заочнидаказ давамарна. Зегьметдин рехъ аялрин “Развитие" т1вар алай бахчада тербиячи яз к1валахунилай башламишна. Гуьгьуьнлай Избербашдин патарив гвай йисан кьиляй-кьилди кардик квай лагерда урус ч1аланни литературадин муаллим яз, са кьадар вахтунда Москвада, Ватандиз хтайла, Сулейман-Стальский райондин официальный сайтдин сифте корреспондент гуьгъуьнлай администратор, МР-дин “Куьре" т1вар алай информациядин агентство ачухайла, анин редактор яз к1валахна.
- Алай йисан мартдин зхирриз райондин кьил Нариман Шамсудиновича и бахчада яргьал йисара зегьмет ч1угур регьбер лайихлу пенсиядиз фенвайдакай, зи хиве бахчадин заведующийвилин везифаяр твазвайдакай хабар гана, - суьгьбет башламишна ада.
■ Раиса вах, куь хиве райондин кьили жавабдар везифаяр тун,-им, сифте нубатда, ашкара квехъ регъбервилин бажарагъ авайди кьат!унна авунвай кар тирди истеклу я. Куьне куь к1валах квелай башламишна?
- Сад лагьайди, к1валахдив, адет хьанвайвал, коллективдихъ галаз таниш хьунилай эгеч1на. Коллективда гзафбур залай яшариз ч1ехи инсанар я, гьавиляй абурун хатур амукь тавун зун латал гзаф важиблу я. Арада гьуьрмет аваз к1валахун, чпин хиве тунвай везифаяр гьар сада намуслудаказ кьилиз акъудун - ибур зи т1алабунни, зи меслятни тирди раижна. Заз аквазвайвал, коллектив зи гъавурда дуьз акьуна. За и кардал шадвалзава.
Кьвед лагьайди, к1валахдив эгеч1ай сифте йикъарилай зун дараматдин * вилер” тир пенжерар “экуь авунал" машгъул хьана. Пенжерар гзаф куьгьне хьанвайбур тир. Абур ва къене патарай к1евдай к1арасдин пенжерарни михьиз хкудна, абур пластикдинбуралди эвезнава. Са гафуналди. бахча са кьадар вижесуз куьгьне зат1арикай азадна.
Пуд лагьайдини, за бахчада к1валахзавайбурун (кризисдин шарт1ар себеб яз зур ставкайрал алуднавайбурун), гьак1ни логопеддин ставкаяр арадал хкун латал чалишмишвилерна. Райондин кьиле авай ксарин куьмекдалди чахъ и карда хъсан нетижаяр хьана, гила саки вири къуллугьчийри мажиб артух кьачузва.
■ Чаз малум тирвал, райондин кьил Нариман Абдулмуталибов бахчадиз мугьман хьана. Адаз т1ал алай месэлайрикай хабар ава...
-Дугъриданни, Нариман Шамсудиновичаз чи дердийрикай хабар ава. Адаз чна гьихьтин шарт1ара к1валахзават1а акуна.Лап четин месэлаяр мукьвал тир гележегда гьялун хиве кьунва. Ик1, лап чарасуз кьилиз акьудна к1анзавай крарик пищеблок ремонт авун, канализация туьк1уьрун, бахча парудалди к1евун ква. Чна умудзава, и крар кьилиз акъудун патал такьатар жагъурда.
Малум тирвал, алатай йисара райондин кьиле авай ксари бахчада видеонаблюдение, пожарный система кардик кутаз ва маса куьмекар гана.
Гьахъ рахайт1а, к1валахал хьайи сифте йикъара зи рик1ик иллаки гзаф къалабулух квай. Авай кьван четин месэлайри зун дарихарзавай. Зи гьал акур гзаф ксари куьмекдин гъил хкажун хиве кьуна. Аллагь рази хьурай чпелай! Ик1, Сив хуьнин сувариз са касди, адаз вичин т1вар кьуна к!ан хьанач, чи бахчадиз 10 агъзур манат гана. Чна а пул гъвеч1и аялар авай группадик пенжер кутун латал харжна. Сулейман-Стальский райондин Собранидин депутат, райондин жегьилрин парламентдин куратор Мегьамед Алиеван, парламентдин председатель Насрудин Нисредован, адан заместитель Нажмудин Бабаеван еке чалишмишвилерин нетижада (жегьилрин парламентдин фондунин куьмек галаз) бахчадиз аялар къугъвадай горка маса къачуна. Идалайни гъейри, абуру чаз гъаятда беседка эцигунни хиве кьунва.
Чи бахчадин гьар са къуллугъчи чпелай алакьдай куьмек гуз гьазур я, герек атай вахтара чпин хизанарни желбзава.
■ Алай вахтунда бахчада гьикьван аялар ава? Куьна тербия къачуз к!андай аялрин кьадар артухардай мумкинвал авани?
- Къенин юкъуз бахчада, аялрин яшариз килигна, 4 группа кардик ква. Анра 100-дав агакьна аялри тербия кьачузва. 1-сентябрдилай абурун кьадар саки 20-дан артух хьана. Гьепбетда, аялрин бахчадиз фидай вахт хьанвай вири биц1екар кьабулдай мумкинвал чахъ авач.
■ Ц1ийи бахча эцигунин месэла квелди куьгягь хьана?
- Дугьриданни, аялрин бахчадин ц1ийи дарамат эцигун федеральный программадик кутунин умудлувал авай. И месэла райондин регьбердин гуьзчивилик ква. Нариман Абдулмуталибова и месэладиз талукь яз еке чалишмишвилер авуна, гьа гьисабдай яз республикадин Кьилин т1варц1ихъ чарарни кхьена. Гьайиф хьи, месэла гьялиз хьанвач. Гьелелигда, я реслубликадихъ, я муниципалитетдихъ ц1ийи бахча эцигдай такьатар авач.
■ Тербиячийрин, санлай коллективдин к1валахдикай лагьанайт1а к!андай...
- Тербиячияр вири гзаф йисарин девлетлу тежриба, чпин к1валахдин гъавурда авайбур, кьилиндини, аялрал рик1 алайбур я. За абурун т1варар кьазвач, абурун виридан к1валахдилай зун, аялар ва абурун диде-бубаяр рази я. Ик1, аялрихъ галаз кьиле тухузвай к1валахдикай рахадайла, заз са кар мадни къейд ийиз к1анзава: кьве вацра чи тербиячийри аялрихъ галаз шад 5 мярекат (аялар хуьнин Международный йикъаз, рекьерин гьерекатдин къайдаяр чируниз, Ст!ал Сулейманан шииратдиз, Россиядин йикъаз, ч1ехи группадин аялрин выпускдиз талукьарна) кьиле тухвана.
Коллективда гьар са кас вичин хиве тунвай везифаяр тамамдаказ ва намуслувилелди кьилиз акъудиз алахъзава: михьивилерзавайда и кар рази жедай гьалда кьилиз акъудзава (масак!а хьун-ни мумкин туш, аялар авай чкада михьивал сифте чкадал хьана к1анда), ашпазри т1ямлу хуьрекар гьазурзава...
■ Коллективдин кьиле акъвазай са куьруь вахтунда еке авторитет къазанмишиз алакьнавай квез, Раиса Надировна, аферин! Квехъ чандин сагъвал, к1валахда мадни еке агалкьунар хьурай!
-Куьнни сагърай!

Рагнеда Рамалданова

"Лезги газет", №39, 28 сентябрь

Количество показов: 1158
28.09.2017