Новости

Моему дорогому отцу Сулейману (Мусаиб Стальский)

Къе вун хайи тарих йикъан,
За гьам рикел гъана, буба
Ви яшайишдин гьалдикай
Зун рахана инал, буба!

Акъатналди дуьньядиз вун
Диде-буба хьана тахкун,
Малумарна чеб чара хьун.
Диде вин рахкана, буба!

Лап гьа кьиляй гъвечиди яз,
Хайи диде авачиз ваз,
Уьмуьр вин, лап тазаз амаз,
Азиятдик фена, буба!

Ирид йикъаз агакьнамаз
Гьа къуншидин гьаятдаваз,
Вахчуна вун вичин патаз
Ви бубади гена, буба!

Кьвед лугьур паб гъанваз гьадаз,
Г ьа тахайди лап писди яз,
Гьажик1ад фу гьич тагуз ваз,
К1андачир вун рик1из, буба!

Хуьрек недай гьа гьан ч1авуз,
К1асиз жедай, мумкин тагуз,
"Дулмад к1усар са пай тур”, луз,
Алахъдай вал йифиз, буба!

Чантада фу мухан ич1из
Туна, къуншид маларив физ,
Йиф хьайила т1уна къаткиз,
Хабар жечир месиз, буба!

Ц1укьуд саваз дуланмишиз;
Фена гьа Дербент шегьердиз,
Хьайит1ани к1ваяах ийиз,
Жибин хьанай ич1из, буба!

Кьуд йиса вун батраквиле
Дербентда са кулакд к1вале,
Са зат1ни гьат тийиз гьиле,
Мад хтана хуьруьз, буба!

Хуьряй къуч1на вун Генжедиз,
Фикир хьанай, гьа гьаниз физ,
Гьа гьана вун дуланмишиз,
Фена фялевилиз, буба!

Кьве йис хьана к1валах ийиз,
Килиг садра эхир кьилиз:
Са кепекни амукь тийиз,
Рахкъуз хьанач к1вализ, буба!

Ина гьак!а гьаларив кьаз,
Катна Самарканддин патаз,
Пуд суз гьана рабочий яз,
Мад алук1на эскиз, буба!

Сырь-Дарьядин ракьун рекьел,
К!валах кьуна гьана муькъвел,
Кьве йисни са шумуд вацрал
Хьана гьанал алаз, буба!

Гьич санални фу батракдиз,
Бегьем такваз сак!ан вилиз
Килигнамаз мад жибиндиз,
Мад хьана гьак! ич1из, буба!

Генже, Баку сад тир михьиз,
К!валахд гьакъи текъвез гъилиз,
Батракд гафар ише тефиз,
Фена вахтар мич1из, буба!

Къанни ц1икьвед хьайла йисар,
Аваз талантдикай хабар,
Гъиле кьуниз гьа-гьа ч1уз кар .
Хьана гьак1а хиял, буба!

Вуна туьк1уьрай сифтегьан ч!ал,
Фена лагьайлахъди чатал,
Дегиш хьана гьабур хиял,
Кткана лап гьак! къал, буба!

“Батракдивай я ихьтин гьал
Лугьуз жедай туш. Вун “пашел”.
Гьинай чуьнуьхна - лугьуз, ч1ал”.
Вал ийичир амал, буба!

Кесибдикай хьунухь шаир
Девлетлуйриз лап залан тир.
Вун хьтин зегьметдик квай фекъир
Эзмишун тир хиял, буба!

Ви гафариз къимет тагуз,
“Вакай шаир жедач”, - лугьуз,
Гьар патахъай гьак! ваз къургъ гуз,
Акьалтдачир винел, буба!

Гьа - гьабурун так1анвилиз...
Килиг тийиз гьич са куьниз,
Хьана к!валах тухуз на кьилиз,
Хвена на шаирвал, буба!..



II

Гьа - гьан ч1улав йикъаз къарши
Совет власть атана чи.
Мич1и дуьнья хьана экуь,
Гана ишигъ, эквер, буба!

Ачухна рехъ гьар патахъди,
Гьич санихъни тушиз к1иви,
Ц1ийи хьана батракди ви,
Ачух хьана рик1ер, буба!

Башламишна колхоз бине,
Хьайилахъди гьа чи хуьре,
Какахьна вун эвел к1венк1ве,
Гуз хьана на эвер, буба!

На ви уьмуьр эхирдал кьван,
Гьич са патахъ тагана ян,
Партияд рекье эцигна чан,
Хьайид я гьа тегьер, буба!

Социализмад нур чк1ана,
Гьар са карда гьалиб хьана
Гила хьана ц1ийи гьава,
Зарб кткана рик1ик, буба!

Сад-садав хьана са стха,
Рик1-рик1ивди хьана мукьва,
Михьиз дуьнья хьунухь гьак1а –
Ваз к1анда азадвилер, буба!

Партияди, гьукуматди
Къимет гана к1валахиз ви;
Гьар патахъди гьяркьуь уьлчуь,
Ачухна ваз рекьер, буба!

Вун кефсуз тир эхир къара,
Ви тапшуругъ мадни пара,
Дуьз рекье тваз, чаз лагьана
Гафар на ви сивин, буба!

“Вафалу хьухь чи Ватандиз,
Гьар са кардал куьн хьухь хциз,
Чан эцига партияд рекьиз",
На лугьудай якъин, буба!


Источник" "Лезги газет"

Количество показов: 542
22.05.2019