Новости

Наш земляк во главе престижной московской поликлиники

E`ldar-Guseynov-228x300.jpg

Россиядин здравоохраненидин Москва шегьерда авай “Лечебно-реабилитационный центр” (ЛРЦ) ФГАУ уьлкведа медицинадин рекьяй хъсан ери авай къуллугъар ийизвай идарайрикай сад яз гьисабзава. Ина гинекологиядин, травматологиядин, ортопедиядин, кардиологиядин ва маса отделенияр, стационар, поликлиника кардик ква. Дамахдай кар ам я хьи, ЛРЦ-дин поликлиникадин заведующий ва уьгьуьяр язавайбур сагъар хъийидай центрадиз регьбервал гузвайди терапевт, пульмонолог, высший категориядин духтур, чи ватанэгьли Гьуьсейнов Эльдар Ражидинович я.
Ери-бине Кьасумхуьрелай тир Эльдар Гьуьсейнова 2004-йисуз Дагъустандин государстводин медакадемия, 2006-йисуз Самарадин военно-медицинский институт акьалтIарна. 2006-2007-йисара “Терапия” пешекарвиляй интернатурада кIелунар давамарна. 2008-йисуз РФ-дин оборонадин министерстводин патав гвай государстводин институтда “Кардиология с курсом неотложной помощи”, 2010-йисуз Москвадин И.М.Сеченован тIварунихъ галай медакадемияда «Кардиология с курсом неотложной помощи», 2012-йисуз «Российская медицинская академия последипломного образования» ГБОУ ДПО-да «Пульмонология» хилерай пешекарвал хкажна. Алай вахтунда чи баркаллу ватанэгьлиди малум тушир къайдада арадал атанвай уьгьуьяр, кIеви ва хронический бронхит, пневмония, бронхийрин астма, трахеобронхит ва жигеррихъ галаз алакъалу маса азарар квайбур сагъар хъийизва.
Къейд ийин хьи, Эльдар Гьуьсейнова медицина­дин хиле кIвалахиз 12 йис я. Ада Москвадин жуьреба-жуьре поликлиникайра ва РФ-дин Яракьлу Къуватрин медидарайра зегьмет чIугунва. Ам Евро­па­дин­ ва Россиядин респираторный обществойрин член я. Тежрибалу духтурди мукьвал-мукьвал пульмонологиядай ва терапиядай тешкилзавай Россиядин ва международный конференцийра иштиракзава­.
Интернетда Эльдар Гьуьсейнован хсуси (dr-guseynov.ru) сайт ава. Духтурди сагъар хъувунвай гзафбуру ана Эльдар Ражидиновичан алакьунар, бажарагъ, чирвал, инсанвилин ерияр къейднавай хейлин баянар тунва. Гзафбуру ам Россиядин виридалайни хъсан пульмонологрикай сад яз гьисабзава.
ЛРЦ Москвада Иваньковский шегьреда 3-нумрадин дараматда ава. Эльдар Гьуьсейнован кьилив физ кIанзавайбурувай нубат кьун патал 8-495-730-98-89, 8-499-193-97-53 нумрайриз зенг ийиз, электронный почтадин eldarguseinoff@ya.ru адресдиз чар кхьиз жеда. Нубат кьуниз талукь гегьенш малуматар ЛРЦ-дин ва духтурдин хсуси сайтра ава.

Автор:   Агьмед Магьмудов
"Лезги газет" 11.01.2018г.


Количество показов: 590
12.01.2018

Возврат к списку