Новости
В образе Гомера
18-майдин алахьай гуьлуьшан югъ. ХХ асирдин Гомеран 150 йис тамам хьун къейдзава, Агъа СтIалдал махлукьат кIватI хьанва. Кьилел хъицикьдин бармак, вичел чухва, кIвачерал шаламар алай, гъиле аса авай СтIал Сулеймана мугьманар хушвилелди кьабулзава… Сагъ я чи Сулейман буба!..
Юбилейдин юкъуз и къамат яратмишнавайди Лезгийрин СтIал Сулейманан тIварунихъ галай госмуздрамтеатрдин актер РФ-дин лайихлу артист Абдуллагь Тажибович Гьабибов я.
— Абдуллагь Тажибовича яратмишнавай къамат акурла, чаз акI жезва хьи, СтIал Сулейман сагъ я, багъда къекъвез, ада цIийи-цIийи эсерар теснифзава, — лугьузва райондин кьил Нариман Абдулмуталибова. — Театрдин сегьнедани чи рикI алай актерди Сулейман бубадин къамат яратмишнава. Чна адаз афирин, чухсагъул лугьузва.
А.Гьабибова къейдзавайвал, Дагъустандин халкьдин шаир СтIал Сулейманан ролда ам 30 сеферда къугъвана, агъастIалви шаирдин тIвар Москвада, Бакуда, Парижда ва масанрани раижна.
— Гьелбетда, СтIал Сулейман хьтин камалэгьлидин, зурба шаирдин, халкьдихъ рикI кузвай инсандин къамат яратмишун регьят кар туш, — хиве кьазва Абдуллагь Гьабибова. — И къаматда аваз адан хуьруьнвийрин, районэгьлийрин, багърийрин вилик экъечIун мадни жавабдар кар я, вични — чIехи шаирдин юбилей къейдзавай юкъуз. СтIал Сулейманан къаматда аваз халкьдин вилик экъечIдайла вун неинки винел патан акунрай, гьакIни рахунрай, къилихдай, къекъуьнрай, ийизвай фикир-хиялдайни гьа касдиз-шаирдиз ухшар хьун лазим я. ГьакI хьун патал зун алахъни ийизва…
СтIал Сулейманан КIвал-музейдин вилик квай багъда хатрутдин чIехи тар ава. Лугьунриз килигна, ам Сулейман бубади цайиди я. Гьа тарцик ацукьна, ада шиирарни теснифиз хьанай.
— И тарцин цIару сериндик ацукьайла, хиялар деринриз физва, рикIик гъалаба акатзава, вилерикай СтIал Сулейманан къамат карагзава, — давамарзава ихтилат Абдуллагь Гьабибова. — Вун, стха, мумкин я чIалахъни тахьун, рикIяй шиирдин цIарар къвезва. Агъа СтIалдилай Дагъустан, лезги халкь дуьньядиз машгьур авур СтIал Сулейман хьтин зурба шаир ва чIалан маса устадар-шаирар акъатун, белки, баркаван и чиливай, инин гуьзел тIебиатдивай ятIа? Зи фикирдалди, гьакI я, — алава хъийизва актерди.
Абдуллагь Гьабибовахъ — “чи йикъарин СтIал Сулейманахъ” галаз секиндиз ихтилатар ийидай мажал зав юбилейдик атанвай мугьманри вуганач, виридаз “юбиляр” герекзавай. Я зун бейкефни хьанач, мугьманар чIехи шаирдин мярекатдиз атанвайбур я…
Алава хъийиз кIанзава хьи, А.Гьабибова сифте Дербент шегьердин культпросвет училищедин актервилин отделение, гуьгъуьнлай Краснодардин культурадин институтдин режиссервилин факультет акьалтIарна, 50 йисалай виниз вахтунда лезги театрда актервиле кIвалахзава. И девирда ада сегьнеда 160-дав агакьна къаматар яратмишна.
КьетIен бажарагъдин сагьиб тир Абдуллагь Гьабибоваз 1986-йисуз Дагъустандин лайихлу, 1995-йисуз Дагъустандин халкьдин ва 2005-йисуз Россиядин Федерациядин лайихлу артиствилин гьуьрметдин тIварар ганва. Баркалла.
"Лезги газет" №23 от 6 июня 2019 г.
Автор: Хазран Кьасумов
Количество показов: 327
13.06.2019
