Новости
Впервые на лезгинской земле
28-июндиз Сулейман-Стальский райондин Цмуррин хуьре пуд юкъуз давам хьайи жегьилрин чирвилерин Международный “Куьре — 2019. Регьберрин несил” форумди вичин кIвалах акьалтIарна. Идакай муниципалитетдин администрациядин пресс-къуллугъди хабар гана. “Лезги газетдин” виликан нумрайра кхьейвал, форумда, уьлкведин регионрай атанвайбурулай гъейри, Азербайжандай, Афгъанистандай, Туркменистандай, Египетдай, Кот-Д-Ивуардай мугьман хьанвай делегатрини иштиракна. Лезги чилел жегьилриз талукьарна ихьтин дережадин мярекат сад лагьай сеферда кьиле тухванва.
РикIел хкин, форумдин тешкилатчийрин арада Сулейман-Стальский райондин администрация, РД-дин милли сиясатдин ва динрин крарин рекьяй министерство, Дагъустандин госуниверситет авай. Медениятдинни образованидин лишанлу и мярекатдиз Имам Яралиеван мергьяматлувилин “Умуд”, “Инсан”, “Леки” фондари, “Рычал-су” ОАО-ди спонсорвилин куьмекар гана.
Форумдин эхиримжи юкъуз итижлу са шумуд мярекат кьиле фена: иштиракчийри, экспертри образование авай гьал веревирдна, Цмуррин чарчардал, “Кпул-ятар” санаторийдиз сиягьатар тешкилна.
Спортдин, медицинадин, туризмдин, хъсан пешекарар гьазурунин месэлайриз талукьарнавай гуьруьшда Сулейман-Стальский райондин кьил Нариман Абдулмуталибова, Дагъустандин МЧС-дин министрдин заместитель Надим Велиханова, боксдай дуьньядин чемпион Альберт Селимова, Россиядин международный дережадин спортдин мастер Гьабиб Аллагьвердиева, грепплингдай кьве сеферда дуьньядин чемпион Далгат Османова ва масабуру иштиракна. Абуру жегьилриз итижлу хьайи суалриз жавабар гана, чпин тежрибадикай суьгьбетна ва уьмуьрда агалкьунар къазанмишунин жигьетдай меслятар гана.
Гуьгъуьнлай “Куьре — 2019. Регьберрин несил” форум акьалтI хьуниз талукьарнавай мярекат гатIунна. Ана Дагъустандин Халкьдин Собранидин депутат Гьамидулагь Мегьамедовани иштиракна. Интернетдин куьмекдалди Москвадай алакъадиз экъечIай меценат, ери-бине Цмурдилай тир Марат Шайдаева форумдин иштиракчийрин тIварцIихъ хуш келимаяр лагьана ва жегьилрихъ гележегда мадни еке агалкьунар хьун алхишна.
Нариман Абдулмуталибова вичин рахунра ихьтин форумар тухунихъ, анра акьалтзавай несилдин векилри иштиракунихъ авай важиблувал къейдна.
— И чIехи мярекатда дуьньядин цIуд уьлкведин векилри иштиракна, — лагьана Сулейман-Стальский райондин кьили. — Форум менфятлуди хьайиди чна вирида гьисснава. Ада чаз жегьилрик къалабулух кутазвай месэлайрихъ галаз мукьувай таниш жедай ва алай вахтунда, гележегда регьберар хьун патал акьалтзавай несилдин векилрин гьазурвал гьихьтинди ятIа чирдай мумкинвал гана. Эгер им сад лагьай форум ятIа, кьвед лагьайдини жеда, — къейдна Н.Абдулмуталибова. Ада гьакIни мярекат кьиле тухун патал спонсорвилин куьмекар гайибуруз сагърай лагьана. “Абурун куьмек галачиз ихьтин форум кьиле тухуз четин жедай”, — алава хъувуна райондин кьили.
Мярекатдин сергьятра аваз са жерге юлдашрив шабагьарни вахкана. ИкI, меценат Марат Шайдаев РД-дин милли сиясатдин ва динрин крарин рекьяй министерстводин Гьуьрметдин грамотадиз ва Сулейман-Стальский райондин администрациядин патай Чухсагъулдин чарчиз лайихлу хьана. Форумдин директор Афият Алиевадив Нариман Абдулмуталибован патай тIварцIин сят вахкана. Тренерар тир Далгат ва Амрулагь Мегьамедоврин зегьметни къейдна.
Жегьилрин вилик РД-дин Халкьдин Собранидин образованидин, илимдин, жегьилрин крарин, спортдин ва туризмдин рекьяй Комитетдин председателдин заместитель Гьамидулагь Мегьамедов экъечIна.
— Форум жуьреба-жуьре уьлквейрай атанвай бажарагълу жегьилрин арада амадагвилин, дуствилин алакъаяр арадал гъайи майдандиз элкъвена, — лагьана ада. — Чи жегьилри атанвай мугьманриз мугьманпересвилин, дуствилин рекьяй хъсан чешне къалурна. Иштиракчийрихъ авай итижлу, фикир желбдай проектар гележегда кардик акатдайдахъ зун кIевелай агъазва, — алава хъувуна депутатди.
ДГУ-дин векил Людмила Бурковади ва къецепатан уьлквейрай атанвай студентри чеб хушдиз кьабулунай, къулай шартIар тешкилунай райондин администрациядин векилриз сагърай лагьана.
Источник: Лезги газет, автор:Ахмед Махмудов
Количество показов: 364
08.07.2019
