Новости

Абидин Камилов о нашем земляке, заведующем НИЛ биологически активных веществ в городе Пермь Рамизе Махмудове

И сеферда чи ихтилат фармацевтикадин илимрин кандидат, Пермдин гьукуматдин милли университетдин биологический затIарин илимдинни ахтармишунрин лабораториядин заведующий, ПГФА-дин инсандин экологиядин ва хатасузвилелди уьмуьр тухунин кафедрадин доцент, А.Фридманан тIварунихъ галай медалдин сагьиб, тIвар-ван авай чи ватанэгьли Рамиз Рагъибович Магьмудовакай я.
Ам Сулейман-Стальский райондин Агъа СтIалрин хуьре дидедиз хьана. Юкьван мектеб агалкьунралди куьтягьайдалай кьулухъ гележегдин алим Астрахань шегьердиз рекье гьатна ва ана медицинадин училищедик экечIна.
1980-йисуз училище куьтягьна, ам Пермь шегьердиз фе­на, ана университетдин химиядин факультетдик экечIна.
РФ-дин Яракьлу Къуватрин жергейра къуллугъ кьилиз акъудна хтайдалай кьу­лухъ, алакьунар авай 2-курсунин студент яз, ам ПГНИУ-дин биологиядин активный затIарин лабораторияда кIвалахал акъвазна.
Са шумуд йисуз илимдал машгъул хьайи Р.Магьмудова, гзаф йисара ахтармишай кIвалахрин нетижаяр агудна, 1998-йисуз «Синтез и биоло­гическая активность произ­водных 4-замещённых 2,4-диоксобутановых кислот и гетероциклических соединений, полученных на их основе» темадай кандидатвилин дис­сертация хвена.
РФ-дин илимдин лайихлу деятель, профессор, химиядин илимрин доктор Юрий Андрейчикован ва доцент, медицинадин илимрин кандидат Е. Пидэмскийдин регьбервилик кваз чи ватанэгьлиди гьайванрал илимдин сифте тежрибаяр тухвана. Лабораториядин жергедин къуллугъчи хьиз кIвалахдив эгечIай Рамиз Магьмудовакай са куьруь вахтунда ПГНИУ-дин тIебии илимрин институтдин илимдинни ахтар­мишунрин лабораториядин за­ведующий хьана. И къуллугъдал ада 2002-йисалай къенин йикъалди агалкьунралди кIвалахзава. Химиядин рекьелди талукь тир ахтармишунар тухвайдалай кьулухъ цIийиз арадал гъизвай дармандин бине Рамиз Рагьибовичан лабора­торияда кутазва. Дарман арадал гъун патал вишералди, агъзурралди химиядин затIар ахтармишзава. Ахтармишун­рин университетда ада 2 агъзурдалайни гзаф цIийи продуктрик биологический менфятлу затIар кIватIна, ахтармишна. Ахтармишай материалрай ада авторвилин 5 шагьадатнама ва цIийи затI арадал гъун патал 16 патент къачуна. Р.Магьмудов 160-далайни гзаф илим­дин макъалайрин ва монографийрин автор я.
20I0-йисуз Р.Магьмудован ахтармишунрин кIвалахриз еке къимет гана — адакай ПГНИУ-дин лап хъсан изобретатель хьана. Са гафуналди, чи ватан­эгьли и университетдин дамах я. КIвалахдин юлдашрин ва студентрин арадани адаз еке гьуьрмет ава. Къуй адахъ мадни зурба агалкьунар хьурай!

Автор: Абидин Камилов

Количество показов: 371
23.08.2018