Документра – дагъвидин уьмуьрдин рехъ
Версия для слабовидящих

Новости

Документра – дагъвидин уьмуьрдин рехъ

Мягьтел жедай кар ам я хьи, гьеле бегьем кIелун-кхьин, чирвилер авачир вахт яз, ада гьар са документ гьакьван дикъетдалди, дуьз къайдада хуьзвай. Агъадихъ ачухзавай малуматар, къейдер адан документрин бинедаллаз кхьизва.

Ихтилат Муртузалиев Мирзеханакай физва. М. М. Муртузалиев 1918-йисуз Кьасумхуьруьн райондин Вини Хъартасрин хуьре дидедиз хьана. Адан буба Муртузалиди 1910-йисалай 1936-йисалди Бакудин нафтIадин мяденра кIвалахнай. 1928-йисуз Мирзехан Баку шегьерда школадиз фена. КIелунар туьрк чIалал физвай, гьаниз килигна хъсан зигьин, кьатIунар авай лезги гадади вичиз хъсандиз туьрк ва азербайжан чIаларни чирна.

5-класс хъсан чирвилер аваз акьалтIарай 1933-йисуз Мирзехан Дербентдин педагогвилин техникумдик экечIна. 1936-йисуз анаг акьалтIарна.

Папкадай заз Мирзеханан бажарагълувал къалурзавай са ихьтин документни жагъана. Са чарче тестикьарзавайвал, техникумдин комсомолдин бюродин къарардалди адаз техникумдин финансрин ва майишатдин кIвалахар ахтармишдай ихияр ганвай. Мирзехан комсомолдиз 1935-йисуз гьахьна.

1936-йисалай М. Муртузалиева хайи хуьре муаллим ва школадин заведующий яз кIвалахна. ВКП(б)-дин РК-дин бюродин къарардалди 1938-йисуз М. Муртузалиев райондин «Колхоздин пайдах» газетдин редакциядиз кIвалахал хутахна. Ина адакай корректор, литработник хьана. 1938-йисан 15-мартдиз партиядин райондин комитетдин къарардалди ам ругуд вацран газетдин работникрин пешекарвал хкаждай курсариз Махачкъаладиз ракъурна. Курсар куьтягьайдалай гуьгъуьниз 1939-йисалди райондин уполномоченный ЛИТО яз кIвалахна.

1939-йисан сентябрдин вацралай Кьасумхуьруьн ВКП(б)-дин РК-дин бюродин къарардалди Мирзехан Кьасумхуьруьн радиоузловой вещанидин редакторвиле тайинарна. 1940-йисан январдин вацра ВКП(б)-дин РК-дин бюроди М. Муртузалиев редакторрин са йисан курсариз Тибилиси шегьердиз ракъурдай къарар акъудна. Амма 1940-йисан 27-июндиз рикIе чIехи мурадар авай жегьил армиядиз рекье туна. Армиядай хкведалди дяве башламиш хьана.

Ватандин ЧIехи дяведин йисара Вини Хъартасрин хуьряй 110-далай виниз кьегьалар Ватан хуьз фронтдиз рекье гьатна. Абурукай чIехи паюниз элкъвена хтун кьисмет хьанач.

Дяведин йисара М. Муртузалиева Ленинград шегьер гьалкъадай акъуддай женгера иштиракна.

1942-йисан 1-июндиз Ленинграддин санай-масаниз ракъурзавай пунктунин карточкадай якъин жезвайвал, М. Муртузалиев младший сержант, связист, отделенидин командир ва ВКП(б)-дин членвиле кандидат я.

Маса документри тестикьарзавайвал, адакай гуьгъуьнлай партиядин член хьана. Мадни, 1943-йисан документрай аквазвайвал, Мирзеханакай сержант, разведчик, взводдин командирдин куьмекчи хьана. Дяведин йисара адал са шумудра залан хирер хьана, госпиталра сагъар хъувурдалай гуьгъуьниз, ам женгерик экечI хъувуна.

Женгинин везифаяр кьилиз акъуддайла халис ватанперес, викIегь хва игитвилелди телеф хьана. РикIе экуь мурадар амаз, хайи Ватандихъ, хизандихъ, багърийрихъ вил галамаз. Игитрин уьмуьр куьруьди жеда, лугьузва мисалдани.

Зи гъиле авай документри шагьидвал ийизвайвал, хуруда асландин рикI авай винихъартасви Мирзехан Муртузалиевич Муртузалиев Ленинграддин областдин Токсовский райондин Перемяки лугьудай чкада (хуьре) 34-нумрадин сура кучуднава.

Багърийри М. Муртузалиеван экуь къамат рикIера хуьзва, уьмуьрда ам фейи рекьел жегьил несилди дамахзава.


Количество показов: 233
29.04.2020

Возврат к списку