Новости

Гьемзет бубадин кьегьалвилер

Дяве. И гафуни рикIер къарсурда, гьакьван къайи гаф я ам. Ватандин ЧIехи дяве алатна 75 йис тамам жезва, а дяведи инсаниятдиз рикIелай садрани тефидай гужар къалурна. Секин чи уьлкведин гьар са пIипIе хьиз, Агъа Хъартасрин жемятдини чпин дуланажагъ цIийиз арадал атанвай Советрин колхозда кечирмишзавай. Ислягь халкьари цанар цаз, гвенар гуьз, йигарар гатаз, ислягь уьмуьр тухузвай.
Гитлеран Германияди чи уьлкведал вагьшивилелди гьужум авурла, Агъа Хъартасрин жегьиларни Ватан душмандикай хуьн патал фронтдиз фена. Абурун жергедай яз Баламетан рухваяр тир Мирземет, Гьемзет ва Алиметни.
Къе заз зи гьуьрметлу апай Гьемзет бубади дяведа къалурай кьегьалвилер рикIел хкиз кIанзава. 1942-йисан 25-мартдиз дяведиз рекье гьатай 20 йиса авай Гьемзетаз элкъвена кIвализ хтун анжах 1948-йисан 19-февралдиз кьисмет хьана.Дяведин хирерин гелер, бедендик къирмеяр рекьидалди кумай.
Зи гъиле СССР-дин НКВД-дин 16-дивизиядай 1943-йисан 24-январдиз ганвай 80-нумрадин справка ава. Ана кхьенва: «Снайпер красноармеец Баламетов Гьемзета 1942-йисан 11-декабрдилай 28-декабрдалди 14 фашист терг авуна». Справкадал штабдин начальник подполковник Прохорован къул ала.
Чанни гьайиф татана, ада душмандихъ галаз викIегьвилелди женг чIугуна, женгинин рекьерай ам душмандин магъарадиз – Берлиндиз кьван фена, Рейхстагдал «Чун гъалиб хьана» гафар кхьена. Дяве куьтягь хьанатIани, ада бандитрихъ галаз Польшада, Украинада женгер чIугун давамарна. Ам гзаф кьадар орденрин ва медалрин сагьиб хьана.
Дяведилай гуьгъуьниз Аллагьди Гьемзет Баламетоваз ислягь уьмуьрни кьисметна. Ада сифте колхозда, гуьгъуьнлай совхозда гьар жуьредин къуллугъар авуна.
1970-йисуз, залзаладилай гуьгъуьниз, Кьасумхуьрел куьч хьана, пенсиядиз экъечIдалди Гьемзет бубади райондин ПУЖКХ-да кьилин бухгалтер яз кIвалахна.
1998-йисан майдин вацра Гьемзет Баламетов регьметдиз фена. Вичиз Аллагьди женнет кьисмет авурай, регьметар гурай!

Количество показов: 489
30.04.2020