Новости

Мастер, боец, прозаик

Республиканская газета «Лезги газет» продолжает рубрику, в которой рассказывает о земляках, живущих за пределами своей малой родины и обстоятельствах, толкнувших их переехать на чужбину.
На этот раз героем материала является уроженец с.Ашага-Стал Сулейман-Стальского района Юрий Нагиев, который в настоящее время живет в г.Набережные Челны, ставшем для него вторым домом.

Представляем материал к вашему вниманию.
Татарстан республикадин Набережные Челны шегьерда яшамиш жезвай ва кIвалахзавай Юрик (Юрмет — эдебиятдин тахаллус я.) Рамазанович Нагъиев вичин эсерар урус чIалал кхьизвай алай аямдин лезги писатель яз машгьур я.
Ам 1962-йисан 21-январдиз Сулейман-Стальский райондин Агъа СтIалрин хуьре дидедиз хьана. Ю.Нагъиев яратмишунрал, илимдал машгъул хизандай я: адан буба Рамазан Нагъиевани вичин вахтунда шиирар кхьена, стха Фейзудин Нагъиев филологиядин илимрин доктор, алай девирдин машгьур шаир я. Муькуь стха Эйзудин Рамазанович медицинадин илимрин доктор, РАЕН-дин академик я. Стхаяр тир Мидеда, Мегьемед-Шафиди ва Роберта Одесса шегьерда институтар акьалтIарна. Вах Эльмира Рамазановнади медучилище куьтягьна ва пешедай кIвалахна, алай вахтунда пенсияда ава.
1973-йисуз, мектебдин 3-классдиз акъатнавай чIавуз, Юрик Нагъиева Избербаш шегьердин интернатда кIелна. 1975-йисан декабрдиз Буйнакскда залзала хьуникди интернатда кIелзавай аялар Урусатдин жуьреба-жуьре чкайриз ракъурна, Юрик Нагъиев Курскдин мектебдиз-интернатдиз акъатна. Ина жегьил тIвар-ван авай тренер Юрий Карпован регьбервилик кваз дзюдодални машгъул хьана. ЧIехи классар ада хайи хуьре анжах “вадар” къачуналди акьалтIарна.
1979-йисуз армиядин жергейра сержант яз къуллугъ кьилиз акъудна. 1982-1996-йисара “Кавказкурортстрой” СМУ-да къванцин устIарвиле кIвалахна.
1998-йисуз ада “налоги и налогообложение предприятий” пешедай Махачкъаладин промышленно-экономический колледж заочнидаказ акьалтIарна. 1997-2010-йисара Юрик Рамазановича Россиядин Яракьлу къуватра къуллугъна. 2005-йисуз Северо-Кавказский Военный Округдин командующийдин къарардалди ам ТКД-дин (ЗАС) начальникдин къуллугъдал тайинарна, прапорщиквилин военный тIварни гана. Яракьлу къуватра ада жуьреба-жуьре йисара жавабдар маса къуллугъарни кьилиз акъудна. ВикIегьвилер къалурунай адаз медаль ва къизилдин сят пишкешна.
Военный пенсионер яз, алай вахтунда ам вичин хизанни галаз Набережные Челны шегьерда яшамиш жезва. Зегьмет галачиз уьмуьр фикирдиз гъиз вердиш тушир ватанэгьлиди алай вахтунда улакьрин рекьер туькIуьрдай карханада бригадирвиле кIвалахзава. Амма адан гьикаятчивилин рекьикай са тIимил гегьеншдиз рахун чарасуз я.
2017-2019-йисара ада “Лебедь” тIвар алай Набережные Челны шегьердин эдебиятдинни яратмишунрин кIватIалда иштиракна.
2017-йисуз кьиле фейи “Славянское братство” конкурсда “Аялдин кьин кьун” гьикаядай адакай финалист хьана. Гьа и йисуз мад са яратмишунрин конкурсда иштиракна ва 1-чка кьуна. Яратмишунрин рекье ада хейлин маса конкурсрани лайихлу чкаяр кьуна.
2018-йисан эвел кьилера МСП-дин (писателрин международный союз) регьбервилик кваз Ю.Нагъиеван гьикаятдин сад лагьай ктаб — “Гатфариз чун хайи дагълариз хъфида” (урус чIалал) чапдай акъатна.
Адан эсерар “Казань”, “Доля”, “Российский колокол” ва маса журналриз, альманахриз акъатнава. Набережные Челны шегьерда 2018-йисуз адан сад лагьай ктабдин презентацияни кьиле фена. Гьикаятчидин “Подарок и Карьерист” эсердикай Москвадай тир журналист В.Лапинади эдебиятдин “Субкультура” интернет-каналда хуш келимаяр лагьана. И интернет-каналда Ю.Нагъиевахъ галаз интервьюни кьиле фейидалай кьулухъ, “Добро” тIвар алай международный эдебиятдин клубдин тешкилатди пулсуздаказ ктаб акъудунин теклиф гана. ИкI, аялар патал кхьенвай гьикаяйрин цIийи кIватIал 2019-йисуз чапдай акъатна.
Винидихъ тIвар кьур гьикаядай ватанэгьлидиз М.Лермонтован тIварунихъ галай конкурсдин диплом, хурудал алкIурдай лишан ва шагьадатнама гана. Гьикаятчиди вичин къелемдин бегьер 2020-йисузни кIелзавайбурув агакьарна — “Слепой и зрячий” тIвар алай нубатдин ктабдиз экв акуна.
Илгьамди са кIусни бейкеф тавуналди, эхиримжи йисара датIана яратмишунрал машгъул Юрик Рамазановичахъ и мукьвара мад са агалкьун хьанва. 9-майдиз ам урус чIалал яратмишзавай Международный эдебиятдин союздиз кьабулнава. Писателдихъ гележегда чIехи жанрайрин эсерар кхьидай фикирни ава.
Вич яшамиш жезвай шегьерда ада милли меденият, чIал хуьнин кардани зарбачивалзава. Лезгийрин тешкилатдихъ галаз сих алакъаяр хуьзвай ватанэгьлиди 2018-2019-йисара шегьердин лезгийриз гьяддин мектебда хайи чIалан тарсарни гана. Алатай йисан октябрдиз кьиле фейи вири дуьньядин умуми диктантдани ада Татарстан республикада авай лезгияр патал муаллимди хьиз иштиракна.
Ю.Нагъиева кьве руш чIехи авунва, абур чпин хизанрин иесияр я. Хва Руслана 6-класс хъсан къиметралди акьалтIарнава. Ам каратэдални машгъул я, шегьерда кьиле фейи акъажунра ада кьве сеферда 2-чкаяр кьуна.
Гьина аватIани, чи ватанэгьлийрихъ сагъвал ва хушбахт яшайиш хьурай!

«Лезги газет»

Количество показов: 334
23.06.2020