Мердали Жалилов о книге «Если народ оценит»
И йикъара чи гъилиз са шумуд автордин макъалайрикай ибарат “Эллериз къадир хьайитIа…” тIвар алай ктаб атанва. Ам гзаф гуьрчегдиз туькIуьрнава, шикилралди безетмишнава, ишлемишнавай чар, рангар михьибур, виле акьадай икьибур я. Гьавиляй ада кIелзавайдан фикирни вичел желбзава.
Квекай я цIийи ктаб?
“Эллериз къадир хьайитIа…” кьил ганвай макъала (автор-тIвар-ван авай журналист-публицист Абдулафис Исмаилов) чи газетдин 2016-йисан 43, 44 — нумрайриз акъатнай. Ана авторди чи халкьдин арадай алай девирда акъатнавай зурба регьбер, тешкилатчи, общественно-политический деятель, халкьдин хва ва арха Имам Музамудинович Яралиеван зурба бажарагъдиз, адан халкь руьгьламишзавай, сад-садав агудзавай, идалди гьар са кас къуватлу ва къудратлу ийизвай крариз, алахъунриз ва алакьунриз баянар ганвай, вичин фикирар лагьанвай. Макъалада, куьрелди лугьун хьайитIа, Имам Музамудинович чи халкьдин алай аямдин Шарвили тирди кьетIендиз къейднава.
Амма, тIебии кар я, гьар са игитдиз адал пехилбурни, ачухдаказ ва я чинебадаказ душманвал ийиз алахънавайбурни жедайди я. Кьакьан рагарал датIана ракъин нурарихъ галаз санал рагъул циферни, къайи муркIарни жедайди чаз чида. Имам Музамудиновични гьакI я.
Хаталуди жувандаз “жуванбурукай” ам маса гуз, усалариз алахъдайбур - чIулав, пичIи руьгьер, пехил рикIер хкатун я.
Арифдар СтIал Сулеймана гьавиляй лагьайди я:
Гьуьруьят хупI хъсан затI я,
Эллериз къадир хьайитIа.
Дугъриданни, масан затI я,
Муьштеридиз чир хьайитIа…
Им гъвечIи зенд туш. Лезгияр уях хьуниз, гьеле Гьажи Давуд, Фетали-хан хьтин регьберрилай гатIунна, Ярагъ Мегьамед, Алкьвадар Гьасан, Кьуьчхуьр Саид, Етим Эмин хьтин арифдаррини эвер ганай. Амма…
Аллагьдиз шукур, Имам Яралиев, Агьед Агъаев хьтин къенин аямдин камалэгьлийри кьил кутуналди арадал гъайи “Шарвили” сувари (эпос кIватI хъувурбур - Забит Ризванов ва Байрам Салимов) неинки са лезгияр, гьакI вири дагъустанвияр, санал са хизанда аваз, сад хьун, абад хьун патал уяхарзавайди чнагьар йисан сувариз гьиссзава.
ЦIийи ктабда и кар генани фасагьатдаказ ачухарнава. Иллаки И.М.Яралиева “Шарвили” суварин сад лагьай мярекатдал (2000-йис) авур докладди, А.Исмаилован инал тIвар кьунвай макъалади, шаир Ш.Шабатован поэмади, амай материалрини кIелзавайдан акьул-камалдив ван ийиз тазва. Чаз неинки Шарвили - эпосдин игит гьакI гьакъикъи Шарвилияр - чи халкьдин гьунарлу рухваяр-гьамиша герек я. Гьахьтин хва я чи Имам Музамудиновични! Лап кутугай вахтунда акъуднавай хъсан ктаб хьанва.
Чна ктаб туькIуьрнавайбур тир Абдулафис Исмаиловаз ва “Лезги газетдин” кьилин редактор Мегьамед Ибрагьимоваз, ана гьатнавай макъалайрин авторриз, ам акъудиз пулдин такьатар жагъурай Сулейман-Стальский райондин кьил Нариман Абдулмуталибоваз баркалла, сагърай лугьузва.
«Лезги газет » от 10.08.2017г.