Новая школа в селе Эминхюр
Дагъустандин образованидин ва илимдин министерстводи хабар гузвайвал, кIелунин 2017-2018-йисуз республикада цIийи цIувад мектеб ачухда: Махачкьалада (804 чка авай), Хасавюртда (1000 чка авай), Каспийскда (1224 чка авай), Буйнакский райондин Нижний Казанище хуьре (534 чка авай), Хасавюрт райондин Петраковский хуьре (504 чка авай), Тарумовский райондин Кузнецовка хуьре (100 чка авай), Сулейман-Стальский райондин Эминхуьре (440 чка авай), Къайтагь райондин Жирабачи хуьре (320 чка авай), Гергебил, Хив. Табасаран, ЦIумада районра (гьар сада 350 чка авай). ГьакIни йисан эхирдалди Къумтуркъала, Хасавюрт, Мегьарамдхуьруьн, Сулейман-Стальский, Леваша, Дахадаев районра ирид, Дагьларин уьлкведин меркездани пуд цIийи мектебар эцигна акьалтIарда.
Мегьарамдхуьруьн райондин администрациядин пресс-къуллугъди кьейд авурвал, 1-сентябрдиз Приморский хуьрени цIийи мектеб ачухдайвал я.
Сулейман-Стальский райондин администрациядин пресс- къуллугъди хабар гузвайвал, 24-августдиз райондин кьил Нариман Абдулмуталибов ва администрациядин жавабдар къуллугьчийрин са десте Эминхуьре эцигнавай цIийи мектебдин дараматдиз килигиз фена.
Эцигунрин кIвалахар тамамарзавайбурухъ галаз кьиле фейи гуьруьшдал пудратчи карханадин прораб Саид Пирмегьамедова кьейд авурвал. Мектебдин тарсар тухудай (учебный) корпус 1-сентябрдиз аялар кьабулиз гьазур я. Дарамат авай гьалдихъ галаз таниш хьайидалай кьулухъ Нариман Абдулмуталибова талукь ксариз 1-сентябрдалди мектебдин къваларив гвай чкаяр зирзибилдикай михьунин, мектебдихъ физвай куьчеда ва дараматдин патарив гвай мулкара къир цунин тапшуругъар гама.
Автор: Ахмед Махмудов
«Лезги газет» №35 от 31 августа 2017 года.