Новости

Шарвили

Шарвили

Юбилейдин мярекатар
Чи “Шарвили” суварин
Гурлуз къейдна Ватанда чи,
Дамах, наз гваз халкьари.
К1ват1на тарих мукьуфдивди,
Авуна ам гъилелай.
Халкьдин дирибашвилер квахь
Тавун латал чилелай.
Лезги халкьдихъ тарих ава
Са куьнивни гекъиг тежер.
Пагьливанар, чанар гьайиф
Татай, чилел эциг тежер.
Ахьтин вик1егь рухвайрин руыъ
Какахьнава ивидик.
Ч1ижери къал къачудайд я
Хуькуьрайла куьнуьдик.
Шарвилидин гьунаррикай
КьепIинамаз дидеди
Цазва кьиле, лай-лай ягъиз,
Вичин багьа куьрпедин.
Дидедизни к1анзава хва,
Руыь аваз Шарвилидин,
Ч1ехи хьана вичин арха,
Рангар сад яз ивидин.
* * *
Имам хьтин вик1егь хци
Тфу гана шейт1андиз,
“Шарвилидин" ч1ехи сувар
Акъудна хьи майдандиз.

Гьар заманда чак, лезгийрик,
Къагьриманар хьайид я.
Гьа патахъай чун, къадим халкь,
Сад Аллагьди гайид я.

Шарвили хьиз, гьатна кIвенкIе.
Халкьдин вилик экечIна,
Ам Ахцегьрин КIелед хивел,
Пагьливан хьиз экъечIна!

Шарвилидин весийрин ван,
На лугьуди, япарихъ
Галукьунвай кьегьалдин
Элкъвена ам халкьарихъ.

Эвер гана, диндирмишна,
Гъана лезги халкь ч1алал.
Халкьди адаз лугьуз хьанай:
“Ваз хъвайи нек хьуй гьалал”.

Регьбервилин къаст рик1еваз
Хайи кас я дидеди.
Ам ахьтинди якъин тирди
Къалурна чаз вядеди.

Ватандал рик1 алай хва я,
Асландин рик1 хуравай.
Гьам себеб яз жедач чи халкь
Вичин чими къулавай.

Дагъустандин халкьарикни
Сувари руьгь кутазва.
А суварин метлеблувал
Абурузни аквазва.

Руьгьдал к1еви жезва вири,
Т1вар кьурла Шарвилидин.
Ватандал мукъаят жезва,
Дагьвияр са ивидин.

Уьлкведизни машгьур хьанва
Къадим халкьдин пак сувар.
Къуй дуьньядал элкъуьрай ам,
Ахъайна вичин лувар.

Ингье къад йис хьанва гила
Чи “Шарвили" суварин.
Гьисс ийизва, к1уллаламач
Залан парар гьамарин.

Шумудан гъил кьаз алакьна
Девирда и къад йисан.
Аквазва чаз Имам тирди
Тешпигь авачир инсан.

Низ чида, мад адан рик1ик
Вуч кумат1а хъийидай.
Гьавиляйни гьар са касди
Кьазва къе ам хайидай.

Шарвили. Ам вуж я? Ам чахъ
Хьайид яни лугьудай
Суал гудайбурни амач,
Сувар хьана кутугай.
Баркалла ваз, чи кьегьал хва,
Халкьар санал агудай!

Ада дамах авурди туш,
Гьисабна бурж яз вичин.
Халкьдин руьгь динж ийизвай къе
Кас я, гьамиша к!вачин.

Инанмиш яз, вили-вилик
Къачузвай мягькем камар,
Гьазур я гьар сад эк1яйиз
Адан кIвачерик гамар.


Источник: «Лезги газет» автор: Шагабудин Шабатов.



Количество показов: 250
15.05.2019

Возврат к списку


Cannot find 'template_yashare' template with page ''