Щедрая и смелая дочь
Кьурагь райондин Агъа Макьарин хуьряй тир Магьмудов Агьмед хуьр, жемят, район, республика патал вичин алакьунар, чирвилер, тежриба, вахт серф авур кас тир. Рагьметдиз фена хейлин вахт ятIани, жемятдин рикIелай ам тефинни касдин пара къени крарихъ, ада вичелай алакьдай кьванбуруз рикIин жумартвилелди авур куьмекрихъ галаз алакъалу я. Гьавиляй агъамакьавияр эвичIнавай ЦIийи Макьарин хуьруьн са куьчедиз адан тIвар ганва.
Мегер ихьтин бубадихъ усал веледар женни? Ваъ, гьелбетда. Адан рухваяр, хтулар къе неинки районда, гьакI республикадани, Россиядани тIвар-ван авай, зурба крарин иесияр я. Рагьметлу писатель Абдулбари Магьмудов ва гьакI шаир Пакизат Фатулаева, Россиядин МВД-дин полковник Магьсуб Магьмудов, Москвада акъатзавай “Еврофутбол” журналдин учредитель Шарафудин Фатулаев, Каспийск шегьердин дуьм-дуьз механикадин заводдин руководителар Имамудин ва Исламудин Фатулаевар, “Мавел” издательстводин директор Мегьамед Магьмудов… Агьмед бубадин сихилдай я. Абурун къени крар къе Россиядин бизнесдин майданда вич алай чка малумарнавай Светлана Таибовади-Магьмудовади лайихлувилелди давамарзава ва идахъ галаз сад хьиз лезги халкьдин тIвар хъсан патахъай кьадай чешмеяр арадал гъизва.
2007-йисалай Пермь шегьерда кардик кутунвай Россиядинни Италиядин саналди тир “Италлогистика” ООО-диз регьбервал гузвай Светлана “Россиядин лидер” лагьай федеральный сертификатдин, “Баркаллу Гъед. Россиядин экономика”, “Россиядин гьуьрметлу гражданин” орденрин, “Карчивал вилик тухунай”, “Еридин милли знак” медалрин, “Вирироссиядин гьуьрметлу руководитель” лагьай тIварцIин сагьиб я. Бажарагълу ва уьтквем руша хайи хуьр, багърияни рикIелай алудзавач. Ада ЦIийи Макьарин юкьван школадин лап хъсандиз кIелзавайбуруз Магьмудов Агьмед бубадин премияр (гьар садаз 2 агъзур манат) гуз кьвед лагьай йис я. ЦIи ихьтин премияр 8 ученикдив агакьна. Шаз Светланади школадин дарамат ремонт авуникни вичин пай кутуна. Адан рикIе мадни хъсан, къени мурадар ава. Са рахунни алач, абурни кьилиз акъатда.
Нариман Ибрагьимов
Источник: "Лезги газет" № 22 от 31.05.2018г.