Новости

Уроженка с. Орта-Стал Сулейман-Стальского района Шаванат Селимова стала обладателем Президентского Гранта

Алатай йисуз кьиле фейи республикадин "Алай аямдин образованида интерактивный технологияр” конкурсда и хиле кIвалахзавай биологиядин бажарагълу, гележег авай муаллимри чпел фикир желбна. Абурун арада чи ватанэгьли, Махачкъала шегьердин 37-нумрадин гимназияда биологиядин тарсар гузвай Шаванат Селимовани авай.
Кьулан СтIалрин юкьван школа акьалтIарай руша Даггоспедуниверситетда биохимический факультетда бакалавриат, магистратура акьалтIарна. Бакалавриат акьалтIарай 2010-йисалай ада республикадин меркездин гьа и гимназияда кIвалахзава. Алатай йисуз Шаванат зоологиядай
аспирантурадикни экечIнава. Са муштулух мадни ава. ЦIи Шаванат Селимова педагогвилин кIвалахда еке агалкьунрай РФ-дин Президентдин Грантдин сагьиб хьанва.
Жегьил пешекар яз шегьердин школада кIвалахиз башламишай Шаванат муаллимди датIана вичин чирвилер хкажиз алахъун лазим тирди кьатIана. ЧIехи жезвай несилдиз  тарсар гунин куьгьне къайдаяр мадни хъсанариз, алай аямдин мумкинвилерикай менфят къачуз, вичин устадвал хкажун патал алахъай Шаванат къе тарсар гунин вичин хсуси  жуьрейрин автор я. Ада абур тарсара датIана ишлемишзава: биологиядин тайин курсунай чирвилер гунин презентацияр, махсус программайрин куьмекдалди туькIуьрнавай тестар ва икI мад. Алай аямдин ученикдиз анжах ктаб кIелун итижлу туш, иниз килигна гзаф аялриз кIелдай ашкъини жезвач. Шаваната ихьтин махсус программайрин, презентацийрин, тестрин куьмекталди абурун фикир тарсунал желбзава. ГъвечIи аялдиз къугъунрин жуьреда чирвилер гун адет ятIа, Шаванатан фикирдалди, ученикриз абуруз итижлу компьютердин, приложенийрин куьмекдалди тарс гун хъсан я.

«ЛЕЗГИ ГАЗЕТ» № 34 от 25.08.2017г.

Количество показов: 1278
24.08.2017