Сулейман-Стальский район
Версия для слабовидящих
Хабарар  

Метлеблу гуьруьш

Алатай гьафтеда райондин Кьил Нариман Абдулмуталибов райондин имамрин Советдин председатель Гьасан-гьажи Амахановахъ галаз гуьруьшмиш хьана. Гуьруьшдин вахтунда районда «Дагъустанвияр терроризмдиз акси я – Ватан багьа» варз тухунин сифтегьан нетижаяр кьуна, райондин территориядал диндин организацийринни республикадин чкадин сомоуправленидин органрин арада сих алакъаяр хьунин, райондин хуьрерин поселенийра диндин общинайрин кIвалах къайдадик кутунин, гьакIни терроризмдизни экстримизмдиз акси кIвалах тухунин махсус буклет акъудунин месэлайриз килигна.
 Райондин имамрин Советдин председателдихъ галаз хьайи гуьруьшдал таниш хьун патал образованидин, здравоохраненидин, культурадин, спортдин, социальный блокдин карханайра тухудай кIвалахдин, гьакIни жегьилрин арада адетдин исламдин нормайрал амал авунин, акьалтзавай несилдин арада тухузвай тербиядин кIвалах гужлу авунин рекьяй тухудай кIвалахрин планни къалурна.
 Н.Ш.Абдулмуталибова райондин имамрин Советди ва кьилди Гьасан-гьажиди тухузвай кIвалахриз рази жедай къимет гана, хуьрерин поселенийрин кьилерихъ, яшлу ва чпиз гьуьрмет авай инсанрихъ галаз санал кIвалахун, и кIвалахдал СМИ-дин такьатрин векиларни желб авун меслят къалурна.
 

Жегьил художникрин выставка

 Районда Дагъустандин халкьарин культурадин ва чIаларин йикъаз талукь яз культурадин Дворецда райондин художественный школадин муаллимри ва аялри тешкилай выставкадиз мярекатдин иштиракчийри еке къимет гана. КIвалахарни изобразительный искусстводин жуьреба-жуьре хилерай тамамарнавай.
 Выставкада «ХХ асирдин Гомер» кьил гана Дагъустандин литературадин классик СтIал Сулейманаз талукьарнавай стендни акъуднавай.
 Са рахунни алачиз, жегьил художникрин выставкадихъни культура ва чIал вилик тухунин рекьяй еке метлеб ава.
 Лена Саидова.

 Райондин депутатрин Собранида

Важиблу ирид месэладиз килигна

DSC_1959 [800x600].jpg 

Алай йисан 7-ноябрдиз «Сулейман-Стальский район» муниципальный райондин вад лагьай сеферда эвер ганвай депутатрин Собранидин 39-заседание хьана. Ам муниципальный райондин Кьил, райондин Собранидин Председатель Нариман Шамсудинович Абдулмуталибова ачухна ва кьилени тухвана.
 Заседанидин кIвалахда райондин администрациядин Кьил Штибег Гьажимегьамедович Мегьамедханова, адан заместителри, райадминистрациядин управленийринни отделрин руководителри, хуьрерин поселенийрин кьилери, районда кардик квай идарайрин, организацийрин ва къуллугърин руководителри, общественный организацийрин ва массовый информациядин такьатрин векилри иштиракна.
Муниципальный райондин бюджетдик 2016-йисуз кухтунвай дегишвилерикай райадминистрациядин финансовый управленидин начальник Магелан Рагьимова информация авуна. Ада къейд авурвал, дегишвилер муниципальный райондин бюджетдиз алава трансфертар атунихъ галаз алакъалу я. Абур Эминхуьруьн школа эцигуниз, библиотекаяр Интернет сетдик кутуниз, гьакIни «Противодействие коррупции», «Противодействие терроризму и религиозному экстремизму», «Развитие интенсивного садоводства», «Защита населения от чрезвычайных ситуаций и явлений техногенного характера», «Развитие малого и среднего предпринимательства» ва маса тайин метлебдин муниципальный программаяр уьмуьрдиз кечирмишуниз рекье твада.
Заседание кьиле физвай вахтунда «Сулейман-Стальский район» муниципальный райондин депутатрин Собранидин гьакъиндай Положение, муниципальный Собранидин депутатрин гьакъиндай Регламент ва муниципальный райондин Кьилин къуллугъдал хкядай кандидатар хкягъунин патахъай конкурс тухунин къайдадин гьакъиндай Положение тестикьарна. Нормативно-правовой актарин делилрихъ галаз депутатар ва заседанидин иштиракчияр администрациядин крар идара ийизвайди тир Рамазан Абдулазизова танишарна.
Ахпа депутатар «Развитие рыбохозяйственного комплекса» тIвар алай тайин метлебдин муниципальный программа гьялунив эгечIна. И программа уьмуьрдиз кечирмишунин мумкинвилерикай «Управление сельского хозяйства и продовольствия» МКУ-дин начальник Мегьамедзагьид Бабаев рахана.
Мадни, заседанидин сергьятда аваз депутатар террористрин гъиликди телеф хьайи ДР-дин къенепатан органрин Сулейман-Стальский районда авай отделдин кьве къуллугъчидин хзанриз материальный жигьетдай куьмек гунин месэладизни килигна. Депутатри вирида сад хьиз и месэладин тереф хвена, талукь къарар кьабулна.
Заседанидин иштиракчияр депутатрин Собраниди 2015-йисан 17-августдиз 272-нумрадик кваз кьабулай «Об утверждении Положения о комиссии по делам несовершеннолетних и защите их прав при администрации муниципального района «Сулейман-Стальский район» решенидин гьакъиндай райондин прокурордин протестдизни килигна. И месэладай заседанидал райондин прокурордин куьмекчи Ямудин Исмаилов рахана.
Заседанидин нетижаяр Нариман Шамсудинович Абдулмуталибова кьуна. Ада заседанидал гьялай месэлайрин важиблувал къейдна, тайин вахтарни къалуруналди, райадминистрациядин жавабдар къуллугъчийриз месэлаяр гьялунин патахъай кIеви тапшуругъар гана.
 Хазран Кьасумов. Шикилар автординбур я.


10-ноябрь – РФ-дин къенепатан крарин органрин работникрин югъ 

Сувар мубаракрай, полициядин къуллугъчияр!

 

Алай йисан 10-ноябрдиз РФ-дин МВД-дин Сулейман-Стальский райондин отделда DSC_1989 [800x600].jpgкъенепатан крарин работникрин Россиядин полициядин йикъаз талукьарнавай мярекат кьиле фена. Аниз и хиле кIвалах авур ветеранризни теклифнавай.
Мярекатда «Сулейман-Стальский район» муниципальный райондин Кьил Нариман Абдулмуталибова, администрациядин Кьил Штибег Мегьамедханова, адан заместителар тир Лацис Оруджева, Садилагь Герейханова, маса жавабдар работникри, СМИ-дин векилри иштиракна.
Тебрикдин келимаяр лугьуналди, мярекат РОВД-дин начальник Играм Османова ачухна.
 Са декьикьада кисна акъвазуналди, мярекатдин иштиракчийри чпин хиве авай къуллугъдин везифаяр тамамардайла игитвилелди телеф хьайи полициядин къуллугъчияр рикIел хкана.
Муниципальный райондин Кьил Нариман Абдулмуталибова мярекатдин иштиракчийриз Россиядин полициядин Югъ рикIин сидкьидай мубаракна, и органра яргъал йисара намуслудаказ зегьмет чIугур ксар рикIел хкана, абурун ватанпересвал къейд авуна.
 - Къуьнерал погонар алай работникри обществода хатасузвал, ислягьвал, къанун-къайда хуьн патал чIугвазвай зегьмет четинди, чирвилерни къуватар серф авун истемишзавайди я, - лагьана Н. Ш. Абдулмуталибова. – Идай абуруз халкьди гьуьрмет, ихтибарни ийизва, чухсагъул малумарзава.
Н. Ш. Абдулмуталибова райондин администрациядин патай террористрин гъиликди телеф хьайи полициядин кьве къуллугъдин хзанриз материальный жигьетдай куьмек яз гьардаз 50 агъзур манат пул авай конвертарни гана.
Идахъ галаз санал, муниципальный райондин Кьили полициядин 11 къуллугъчидив райондин администрациядин Гьуьрметдин грамотаярни вахкана.
Тебрикдин келимаяр гваз анал райондин прокурор Фархад Акимов, Россиядин ФСБ-дин райотделдин начальник Зураб Тагьиров, районрин уртах силисдин отделдин начальник Девлетхан Оруджев, РОВД-дин начальникдин заместитель, силисдин отделдин начальник Ражидин Абакаров ва маса юлдашар рахана.
РОВД-дин къайдаяр хуьдай органрин ветеранрин Советдин председатель Фазил Жамалдинова мярекатдал РФ-дин полициядин тарихдикай ам фейи баркаллу ва четин рекьикай гегьенш рахунар авуна, идак райотделдин къуллугъчийрин еке пайни квайди къейдна.
Райондин къенепатан крарин отделдин начальникдин заместитель Къаинбег Куьребегова РФ-дин полициядин йикъахъ галаз алакъалу яз акъуднавай приказ кIелна, адан бинедаллаз чпин хиве авай везифаяр намсулудаказ кьилиз акъудунай чухсагъулар малумарнавай ва нубатдин чинар ганвай полициядин къуллугъчийрин тIварар кьуна.
РОВД-дин начальник Играм Османова пешекарвилин суварихъ галаз алакъалу яз отделдиз атунай, шадвилин мярекатда иштиракунай, тебрикдин келимаяр лугьунай ва къуллугъчийрив райадминистрациядин Гьуьрметдин грамотаяр вахкунай Нариман Шамсудинович Абдулмуталибоваз рикIин сидкьидай чухсагъул лагьана ва саналди тухузвай кIвалахди вичин хъсан нетижа гудайдахъ инанмишвал авуна.
 Текст кхьейди ва шикилар ягъайди Хазран Кьасумов я.


Чи дамах

444444444.JPG

Пешекарвилин сувариз чи рикIел чпин вири савадлу уьмуьр къанун-къайда, агьалийрин хатасузвал хуьнин кардиз бахш авур чи ветеранар хкведа. Абурукай хейлинбуру, лайихлу пенсияда аватIани, чи отделдин сотрудникрихъ галаз сих алакъа хуьзва. Абур чи умудлу даяхар ва дамахар, чи насигьатчияр я. Ахьтинбурун жергедай яз заз къе вичи гзаф йисара чи райондин къенепатан крарин отделдин начальниквилин жавабдар къуллугъ кьиле тухвай чи ветеран, жегьилрин насигьатчи полициядин подполковник Пирисмаилов АбдулнетIиф НатIифовичакай кхьиз кIанзава.
 А. Н. Пирисмаилов 1932-йисуз Кьулан СтIалдал хана. ГъвечIизамаз дяведин йисарин четин уьмуьр акур, зегьметда лигим хьанвай жегьил гада Кьасумхуьруьн юкьван школа акьалтIарайла райондин прокуратурада секретарвилин кIвалахдал хьана. 1952-йисуз ВЮЗИ-дик Вирисоюзный юридический заочный институт) кIелиз экечIна.
1954-1956-йисара армияда къуллугъ авуна. Заочнидаказ кIелни ийиз, 1957-йисуз жегьил гада Кьасумхуьруьн РОВД-да секретарь-счетоводвилин къуллугъдал акъвазна. 1959-йисуз ам дознанидин оперуполномоченныйдин, зур йисалайни старший оперуполномоченныйдин къуллугъдал тайинарна. Гьа и йисан январдин вацра ам Дагъустанда сифтегьанбурукай сад яз «Отличник милиции» значок гуниз, СССР-дин милициядин лап хъсан работникрин Вирироссиядин совещанида иштирак авуниз лайихлу хьана.
1962-йисуз Дагъустанда чIехи районар тешкилун кьиле фена. Кьасумхуьруьн, Мегьарамдхуьруьн ва Кьурагь районрикай Кьасумхуьруьн са район авуна. Гьа и йисуз СССР-дин МВД-да силис тухудай аппарат тешкилна. Кьасумхуьруьн РОВД-дани ДАССР-дин МВД-дин следственнный группа тешкилна. Ина старший следователвиле Пирисмаилов Абдул-нетIиф НатIифович тайинарна. И къуллугъдал ада вич савадлу пешекар яз къалурна. Адаз намуслу зегьметдай РСФСР-дин Верховный Советдин Президиумдин Указдалди, Дагъустанда сад лагьайди яз, «За отличную службу в органе общественного порядка» медаль гана.
1967-йисуз ам Кьасумхуьруьн РОВД-дин начальниквилин жавабдар къуллугъдал тайинарна. Адалай куьруь са вахтунда сад тир, тупламиш хьана кIвалахдай коллектив арадал гъиз алакьна. Тахсиркарвилерихъ галаз женг чIугунин жигьетдай къазанмишнавай нетижайрай и отдел республикада кIвенкIвечийрин жергеда хьана.
1976-йисуз кIвалахда къазанмишнавай виниз тир нетижайрай КПСС-дин Дагъустандин обкомдин бюродин, Министррин Советдин, профсоюзрин обкомдин къарардалди райондиз гъиляй-гъилиз къведай Яру Пайдах гана. РОВД-дин начальник А. Н. Пирисмаилован шикил СССР-дин МВД-дин Гьуьрметдин Доскадиз акъудна.
1979-йисуз ам Избербашдин ГОВД-дин начальниквилин къуллугъдал тайинарна. 1980-йисан ноябрдиз, силисдин тежрибалу работник хьиз, РД-дин МВД-дин следственный управленидин начальникдин заместителвилин къуллугъдал эцигна. Кьве йисалай, 1982-йисан ноябрдиз, КПСС-дин Дагъустандин обкомдин бюродин къарардалди ам Кеферпатан Къафкъаздин ракьун рекьерин управленидин УВДТ-дин ихтиярдиз-транспортдин рекьяй Махачкъаладин милициядин управленидин начальниквилин къуллугъдал рекье туна. Инани ада, вичиз хас тирвал, къайда туна, кIвалах куьруь са вахтунда вичин кьацIа туна, коллектив сад авуна.
1987-йисуз А. Н. Пирисмаилов вичин рапортдалди гуьгьуьллудаказ лайихлу пенсиядиз экъечIна. Ам анин руководстводи «Зегьметдин ветеран» медаль, къиметлу пишкешарни гана, шад гьалара рекье туна.
2012-йисан 18-ноябрдиз Дагъустан Республикадин къенепатан крарин ва къенепатан кьушунрин органрин ветеранрин Советдин тIварцIихъай адаз, 6-нумрадик кваз, «Знак почета ветеранов труда» знак гана.
Вич хьайи вири къуллугърал АбдулнетIиф НатIифовича вичин кеспидиз вафалувал, тешкилатчивилин, руководителвилин алакьунар, мягькем коллектив арадал гъунин, тупламишунин бажарагъвал къалурна. Адахъ галаз санал кIвалахай, гьакIни гуьгъуьнлай кIвалах авур ва алай вахтундани кIвалахзавай полициядин гзаф работникар гьалтай чкадал «начальник» лугьуз рахада. Им адаз гьуьрмет авунин чIехи лишан я.
Уьмуьрда активный тереф кьунвай, хайи халкь, Ватан кIевелай кIани инсан, адалатлу хзандин кьил тир ам чаз гьамиша куьмек ва герек я. Ам чи районда адалат къайда хуьнин, акьалтзавай несилдиз ватанпересвилин тербия гунин месэлайрай хуьре кимел, мектебра, СМИ-рин такьатIрай, хуьруьн сходрал къиметлу меслятар гваз рахаз аквада. Ам чи умудлу даях ва дамах я.
Пешекарвилин суварин югъ мубарак авунихъ галаз санал чаз АбдулнетIиф НатIифовичахъ ва гьакIни чи амай ветеранрихъ, вири сотрудникрихъ чандин сагъвал, кIвалера ислягьвал ва мублагьвал хьана кIанзава. 

 Ф. М. Жамалдинов, РОВД-дин ветеранрин Советдин председатель.


ЦIийи уьзуьмлухар кутазвайбуруз – чубукар

Чи райондин экономикада уьзуьмчивили кьилин чка кьазва, цIийи уьзуьмлухар кутазвай хуьруьн майишатдин карханайрин, КФХ-рин ва арендаторрин кьадарни йисандавай-суз артух жезва. «Развитие сельского хозяйства и регулирование рынка сельскохозяйственной продукции, сырья и продовольствия на 2014-2020гг» гьукуматдин программадин бинедаллаз райондин карханайра, арендадин участокрани 2016-йисан зулухъай цIийи уьзуьмлухар кутун лазим я. Гьелбетда, уьзуьмлухар кутун патал чубукар кIанда, чебни сертификат авай ва еридинбур.
И йикъара чи управленидиз ДР-дин хуьруьн майишатдин ва суьрсетдин министрдин везифаяр тамамарзавайди К. Камалутдиновалай чар атана, ана чубукар гьасилзавай карханаяр ва кьилдин ксар къалурнава. Минсельхозпродди карханайриз ва арендаторриз чеб азаррикай ва зиянкар гьашаратрикай хуьн патал гьялнавай чубукар маса къачун меслят къалурзава. 

Ихьтин чубукар «Татляр» агрохолдингда, «Уллутерекеме» питомникда (Дербент район), «Новоикринский» питомникда», «Каякентское» (Къаякент район), «Избербашский» ВКЗ ОАО-да, «Хасбулат-кутан» (Левашинский район), Дербентдин селекцийрин тежрибадин уьзуьмчивилин станцияда «Калашников» КФХ-да (Ставропольский край), «Фанагория-аграда» (Краснодарский край), «Заречный» ИП-да (Ростовский область) ва Сербияда гьасилзава. Анрай карханайривай ва арендаторривай чи шартIара дурум гузвай ва хъсан бегьер гъизвай Август, Первенец, Магарача, Молдова, Ркацители, Агадаи, Дунаев лазурь, Цит магар-русис, Анец белый, Восторг, Надежда азос, Мускат ливадия, Кодрянка, Цимлян черный, себеряковский, Шардоне, Мускат-оттонель, Алиготе, Мерло, Сислинг, Уньиблан ва маса сортарин ципицIрин чубукар маса къачуз жеда. Чубукар маса къачудай карханайриз ва арендаторриз чи управленидини куьмекар гуда.
Гьамидин Абдулкъафаров, райондин УСХ-дин начальникдин заместитель.

Терроризмдиз акси комиссиядал

Нетижаяр кьуна

3-ноябрдиз райадминистрацияда районда кардик квай терроризмдиз акси комиссиядин нубатдин заседание хьана. Анал «Дагестанцы против терроризма – Родина дороже» республикадин вацран сергьятра аваз районда тухванвай кIвалахрин нетижаяр кьуна, терроризм ва диндин экстремизм тагькимарунин, абурун вилик пад кьунин жигьетдай райондин вири къурулушрин кIвалах гележегда алакъаламишунин жигьетдай вилик акъвазнавай месэлайриз килигна.
Заседанидин кIвалахда муниципальный райондин Кьил, и комиссиядин Председатель Нариман Шамсудинович Абдулмуталибова, райадминистрациядин кьилин заместителри, адан къурулушдин подразделенийрин, образованидин идарайрин, райондин сергьятда авай къайдаяр хуьдай органрин руководителри, хуьрерин поселенийрин кьилери, общественностдин, диндин ва СМИ-дин векилри иштиракна.
Заседание ачухуналди, муниципалитетдин руководитель Н. Ш. Абдулмуталибова къейд авурвал, Дагъустандин Прокурордин теклифдалди республикада терроризмдихъ ва диндин экстремизмдихъ галаз женг чIугунин ва тагькимарунин профилактикадин кIвалахрин вацран сергьятра аваз чи райондани са жерге серенжемар кьиле тухванва, общественный ва хатасузвилин гьалар хейлин секин хьанва, чи райондин сергьятда кардик квай бандитрин десте терг авунва. Гьа са вахтунда профилактикадин серенжемар кьиле тухунихъ галаз алакъалу тир чIехи кIвалах кьиле тухун чи вилик акъвазнава. И кардал районда авай вири савадлу къуватар, общественностни желб авуна кIанда. – Анжах чи виридан чалишмишвилер сад авуналди, гьар садан ватандашвилин жавабдарвал хкажуналди, чавай XXI асирдин и тIегъуьндин аксина умудлудаказ ва мягькемдаказ акъвазиз жеда, - лагьана вичин рахунрин эхирдай Н. Ш. Абдулмуталибова.
Анал республикада малумарнавай вацран сергьятра аваз ва махсус пландин бинедаллаз чи районда терроризмдин ва диндин экстремизмдин аксина кьиле тухвай серенжемрикай гегьенш гьахъ-гьисаб гваз общественный хатасузвал хуьнин рекьяй райадминистрациядин кьилин заместителдин везифаяр тамамарзавайди тир Садилагь Герейханов рахана. Ада къейд авурвал, планда тайинарнавай серенжемар чпин талукь тир вахтара, неинки райондин образованидин идарайрин коллективрин, кIелзавай аялрин, гьакIни прокуратурадин, къайдаяр хуьдай органрин, чпи чеб идара ийидай органрин, общественный тешкилатрин, диндин, СМИ-рин векилрин, райондин хуьрерин жегьилрин ва гьуьрметлу ксарин иштираквал аваз кьиле фена. И карди вичин хъсан нетижаярни гана. Кьилди къачуртIа, и серенжемра 800 касдилай виниз райондин муаллимри ва аялри иштиракна.
Заседанидал алай месэладай анал чпи тухвай ва тухузвай кIвалахрикай фикирар ва теклифар гваз райондин прокурор Фархад Акимов, С.-Стальский районда авай ФСБ-дин отделдин начальник Зураб Тагьиров, РУО-дин кьилин пешекар Венера Абдуселимова, райадминистрациядин ГО-дин ва ЧС-дин начальникдин заместитель Къазагьмед Абумуслимов, Герейханован хуьруьн поселенидин администрациядин кьил Руслан Алдыров, райондин имамрин советдин председатель Гьасан-гьажи Амаханов рахана.
Заседанидин нетижаяр кьуналди ва са жерге тапшуругъар гуналди, эхирдай Н. Ш. Абдулмуталибова, террористри яна кьейи чи районэгьлияр – полициядин офицерар тир Жалалдин Ханбабаеван, Герман Ягьяеван хзанриз ва хендедайриз райондин резервдин Фондунай материальный куьмек гунин жигьетдай райондин Общественный советди гъайи теклифдин тереф хвена ва и кар полициядин пешекарвилин суварин юкъуз кьиле тухунин тапшуругъ гана.
Гьа иналди заседаниди вичин кIвалах акьалтIарна.

 А. Камилов.

Райондин уьмуьр: мярекатар ва лишанлу вакъиаяр

Школадин юбилей къейдна

IMG_7281 [800x600].jpg1-ноябрь. И югъ Россиядин Игит Радим Халикьован тIварунихъ галай Кьулан СтIалрин юкьван мектебдин педколлективдин ва и хуьруьн жемятдин уьмуьрда лишанлу ва яргъалди рикIел аламукьдайди хьана.
 И юкъуз ина хуьруьн школадин I00 йис тамам хьуниз талукьарнавай шадвилин еке мярекат кьиле фена. И йикъан вилик мектебдин дарамат адан 100 йисан юбилейдиз талукьарнавай тебрикдин гафаралди, лозунгралди, шикилрин стендралди ва банерралди безетмишнавай.
Ингье, фадлай вил алай, рикIерик къалабулухвал кутазвай декьикьаяр алукьна. Сятдин 10 тамам жедайла гьар рангарив ва цуькверив безетмишнавай школадин дарамат галайвал муаллимар, гьар йисара и мектеб акьалтIарай выпускникар, педагогвилин зегьметдин ветеранар, теклифнавай мугьманар, чина хуш хъвер аваз, чпи-чпиз мярекат – школадин 100 йисан юбилей тебрик ийиз, майдандал кIеретI-кIеретI хьана, атана.
Гьуьрметлу мугьманрин жергеда муниципальный райондин Кьил Нариман Шамсудинович Абдулмуталибов, ДР-дин Халкьдин Собранидин депутат, А. А. Тахо-Годидин тIварунихъ галай педагогикадин илимдинни ахтармишунрин институтдин директор, академик Гьамидулагь Исмаилович Мегьамедов, РУО-дин начальник Индира Гьажибалаевна Османова, райондин Общественный советдин председатель Алимет Алиметович Мейланов ва маса юлдашар авай. Абур школадин коллективди, зуьрнейрин туьнт авазрик кваз, хушвилелди кьабулна.
Шадвилин мярекат Россиядин Федерациядин Гимн тамамарунилай ва Дербент шегьердин «Каспий» ансамблдин са дестеди еке гьевесдивди авур кьуьлуьнилай башламиш хьана.
Шадвилин мярекатдиз кIватI хьанвайбурун вилик тебрикдин хуш келимаяр гваз и школадин директор Ифриз Бабаева рахана. Ада анин педколлективдихъ хьанвай агалкьунрикай, вилик акъвазнавай, гьялна кIанзавай месэлайрикай, гележегдин планрикай куьрелди суьгьбет авуна, тебрикдин хуш келимаяр лагьана.
Гаф муниципальный райондин Кьил Н. Ш. Абдулмуталибоваз гана.
 – Гьуьрметлу муаллимар, педагогвилин зегьметдин ветеранар, – лагьана Нариман Шамсудинович Абдулмуталибова. - Чи акьалтзавай несилдиз дуьз тербия, чирвилер гун патал куь гьар йикъан дурумлу зегьметдай заз квез рикIин сидкьидай чухсагъул лугьуз кIанзава. Куь чирвилери ва тежрибади инлай кьулухъни санлай районда марифат вилик тухунин кардиз еке куьмек гудайдал шак алач. Чаз школадихъ инлай кьулухъни виниз тир нетижаяр, коллективдихъ сагълам чанар, яратмишдай къуватар ва бажарагълу ученикар хьана кIанзава.
Тебрикдин хуш келимайрилай гуьгъуьниз райондин Кьил Н. Ш. Абдулмуталибова педколлективдиз райондин Гьуьрметдин грамота, школадизни диван, принтер ва гъвечIи классдин аялриз хуьрекар гьазурдай газдин пич савкьват яз гана ва гьакIни и мярекатдин спонсорар тир ДР-дин Халкьдин Собранидин депутат Марат Алияровав, меценат Абдулвагьид Жаватовав Чухсагъулдин чарар вахкана.
Суварин мярекатдал тебрикдин гафар гваз ДР-дин Халкьдин Собранидин депутат Гьамидулагь Мегьамедов, райондин Общественный советдин председатель Алимет Мейланов, РУО-дин начальник Индира Османова ва маса юлдашар рахана.
Кьилди къачуртIа, школадин директордин заместитель Эльвина Гуьлмегьамедовади вичин рахунра къейд авурвал, 1966-йисуз и мектебдикай юкьван школа хьана. Адаз РФ-дин Президентдин грантни (премия) гана. 2003-йисалай школа Россиядин Игит Радим Халикьован тIварцIихъ гала. Анал гьар йисара и школадиз регьбервал гайи руководителрин, педагогвилин зегьметдин ветеранрин тIварар кьуна, гурлу капар ягъунихъ галаз санал, аялар абурун портретар гваз майдандал къекъвена.
Межлис анал авур рахунрин арайра кьуьлер авунихъ галаз санал, школадин муаллимри, аялри, Дагъустандин эстрададин артистри лагьай манийри мадни гурлу авуна.
Школадин 100 йисан юбилейдин мярекатда иштирак ийиз СтIал Сулейманан тIварунихъ галай Лезгийрин госмуздрамтеатрдин артистрин делегацияни атанвай. Анал тебрикдин хуш келимаяр гваз рахай и театрдин директор Динара Эминовади коллективдин тIварцIихъай пишкеш яз школадиз СтIал Сулейманан портрет гана.
И мярекатдин шадвилин пай школадин юбилейдин зенг ягъуналди ва дараматдин вилик квай Россиядин Игит Радим Халикьован гуьмбетдал цуьквер эцигуналди куьтягь хьана.
И юкъуз гьакI школада тешкилнавай Россиядин Игит Радим Халикьоваз талукьарнавай музейни шад гьалара ачухна.
И мярекат неинки и хуьруьн, гьакI райондин уьмуьрдани лишанлу вакъиадиз элкъвена. Абидин Камилов. Шикилар Х. Кьасумованбур я.

Тават Залбеговадин 90 йис

РикIелай тефидай къамат

Вахт. Ам санал акъвазнавач. Вахтунихъ галаз гзаф крар, вакъиаярни тарихдиз физва. Бубайрин мисалда лугьузвайвал, устIар кьейила, кар амукьда, инсан кьейила - тIвар. Эхь, лайихлу ксарин тIварар, экуь къаматар, абуру авур хъсан крар несилрин рикIелай алатдач.
Гьа ихьтинбурукай сад КПСС-дин XXIV съезддин делегат хьайи Залбегова Тават Къурбановнани тир. Эгер ам чи арада амайтIа, гуьзел къаматдинни гзаф баркаллу крарин иеси хьайи и мегьрибан дишегьлиди 12-ноябрдиз вичин 90 йис тамам хьунин юбилей къейддай. Гьайиф хьи, и югъ адаз кьисмет хьанач.
 Т.Залбеговадихъ галаз зун 2000-йисан ноябрдин вацра таниш хьанай. Гьа вахтунда ада заз лагьай ихьтин келимаяр зи блокнотда ама. “...За жуван вири уьмуьрда халкьдиз жедайвал къуллугъна. Жуван мецикай масадан кефи ханач, инсанрихъ галаз хъсандиз кьиле фена, жедай куьмекар гана. Акьван чIехибур туштIани, къуллугъарни за авуна. Халкьди зун партиядин XXIV съезддин делегатвиле хкяна. Ибур, чан хва, за жуван бахтлувилин лишанар яз гьисабзава...”
Эхь, Т.Залбеговади бар¬каллу уьмуьр кечирмишна. 1926-йисан 12-ноябрдиз Кьасумхуьруьн райондин Кьианрин хуьре дидедиз хьайи ада ана сифтегьан мектеб, Цмурдал 7-класс, 1943-йисуз Дербентдин пе¬дучилище акьалтIарна. Ви¬чин зегьметдин рехъ Кьи¬анрин сифтегьан мектебда муалливиле кIвалахунилай башламишна. Гъуьлуьз фейила, кьисметди Тават Герейханован хуьруьз акъудна. Ина ада са шумуд йисуз аялрин бахчадин заведующийвиле кIвалахна. Хъсан чирвилер, михьи рикI авай и дишегьлидиз 1965-йисуз хуьруьнвийри еке ихтибар авуна: ам Герейханован хуьруьн Советдин председателвиле хкяна. Жавабдар и везифаяр Тават Къурбановнади 18 йисуз намуслудаказ кьилиз акъудна. Хуьре и йисара Культурадин дворец, участковый больницадин, гьамамдин, консервиярдай заводдин дараматар, 8 квартирадин яшайишдин кIвал эцигна. Агьалияр хъвадай целди таъминарна, куьчейра къван туна, аваданламишунин хейлин маса кIвалахарни авуна. И йисара Советди государстводиз cap, як ва маса шейэр маса гунай планар артухни алаз тамамарна.
Тават Къурбановна пред¬седатель тир йисара хуьруьн Советдиз садра СССР-дин Министррин Советдин, кьуд сеферда ДАССР-дин Ми¬нистррин Советдин, са шумудра партиядин райкомдин патай Яру пайдахар гана, Советдин тIвар республикадин Гьуьрметдин доскадизни акъудна.
1982-йисуз Т. Залбегова пенсиядиз экъечIна. ЯтIани ам жемятдин къайгъуйривай, кIвалахдивай къерех хьанач. Райондин руководстводин, жемятдин тIалабуналди ада 1991-йисалди советдин секретарвиле кIвалах хъувуна.
Инанмишвилелди лугьуз жеда хьи, Тават Къурбановнади хуьруьн тIвар хкажна. Ада Советда кIвалахиз башламишайла, хуьре авайди 350 кIвал тир. КIвалахдилай экъечIдайла, ина агъзурдалай виниз кIвалер хьанвай.
Са рахунни алачиз, хуьр-кIвал, жемят патал Тават Залбеговадин зегьметар екебур хьана. Ада райондин общественный уьмуьрдани активвилелди иштиракна. Гьавиляй халкьдин патай Т.Залбеговадиз еке ихтибар, гьуьрметни хьана. Ам КПСС-дин XXIV сьезддин, са шумудра райондин, кьве се¬ферда Дагъус-тандин облас¬тной партконфе-ренцийрин делегатвиле, яргъал йисара хуьруьн ва райондин советрин депутатвиле хкягъуни и кардин гьакъиндай ачухдаказ шагьидвал-зава.
Т. Залбеговадин яргъал йисарин намуслу зегьмет ДАССР-дин Верховный Со¬ветдин Гьуьрметдин грамо¬та, “Зегьметдин ветеран”, “Ватандин ЧIехи дяведа Гъалибвилин 50 йис” медалар, “Соцсоревнованида гъалиб хьунай” знакар гуналди къейдна. 2003-йисан 9-майдиз инсафсуз ажалди Тават Къурбановна чавай къакъудна. Амма уьмуьрдин баркал¬лу рехъ фейи, хийирлу гзаф крар авур, халкь патал зегь¬метар чIугур и камаллу дишегьлидин экуь къамат инсанри садрани рикIелай алуддач. Тават Къурбановна хьтин инсанрин тIварар мидаим я.
 Хазран Кьасумов.